Qazirgi kezde jańashyl muǵalim retinde damý – ýaqyt talaby. Jańashyl ustaz retinde kórinip, zaman aǵymyna saı shákirtterge memlekettik tildi meńgertetin til mamany bolý úshin jańa ádister qoldanýdyń tıimdiligi óte zor. XXI ǵasyr ustazy búgingi kún talabyna saı jan-jaqty damyǵan, tereń bilimmen qarýlanǵan oqýshy tulǵasyn somdaý úshin ózi de sheberliktiń shyńynan kórinýi tıis. Qazirgi tańda oqý úrdisinde qazaq tilin oqytýda san alýan jańa ádis-tásilder sapaly bilim berýde úlken ról atqarady.
Qazaqstan Respýblıkasy Táýelsizdiginiń 25 jyldyǵy qarsańynda, Qaraǵandy qalasynyń №40 negizgi mektebinde «Táýelsiz Qazaqstannyń tanymal kóshbasshysy» atty HHI ǵasyr kóshbasshysy zııatkerlik oıynyn uıymdastyrdyq. Oǵan mektebimizdiń Adına Leven, Damır Túsipov, Tatıana Nıkandrova, Mádına Omarova, Abylaı Jumajanov, Mereı Ábdimomynova, Bekjan Ońdasyn, Shyryn Dıdarbekova, Nurgúl Ahmet, Natalıa Metelısa, Seda Iýnýsova, Valter Letkıman tárizdi qazaq tili men ádebıeti páninen meılinshe júırik shákirtteri qatysty. Olar «Murager» jáne «Arman» atty eki topqa bólindi. «Báıge», «Polıglot», «Til óneri», «Oılan, tap!», «Jorǵa» dep atalǵan kezeńderden quralǵan saıys asa qyzyqty ótti. Mektep ákimshiliginen quralǵan qazylar alqasy saıys sońynda «Arman» tobyn jeńimpaz dep tanyǵanmen, eki top ta osal kóringen joq.
Oqýshylarǵa zaman talabyna saı sapaly, tııanaqty bilim berý – muǵalim aldyndaǵy úlken mindet. Oqytýdyń jańa pedagogıkalyq tehnologııalaryn sabaqqa engizý búgingi tańda árbir ustazdyń basty maqsaty bolýy shart. Sebebi, elimizge zaman talabyna saı oılaı alatyn, shuǵyl sheshimder qabyldaı biletin, belsendi, shyǵarmashyl azamattar qajet. Sabaqta tek bilimdilik maqsattardy sheship qoımaı, balalardyń jeke bastarynyń qasıetterin, qabiletterin damytýdyń joldaryn qarastyrýda dástúrli oqytý men damyta oqytýdyń aıyrmashylyǵyn salystyrý kestesi arqyly kórsetýge bolady. Muǵalim bul júıemen jumys jasaǵanda, únemi oqýshy sanasynda bolyp jatqan ózgeristerdi baqylap, onyń damýyn jan-jaqty zertteı otyryp, óz sabaqtaryn soǵan saı ózgertip otyrýy tıis.
Menińshe, jańa zaman muǵalimi óz boıyndaǵy barlyq jaqsy qasıetterdi oqýshylarǵa bilim berý men tárbıeleýde úılestire otyryp darytýy kerek. О́z oılaryn erkin jetkize alatyn, alǵan bilimderin ómirde qoldana alatyn oqýshylardy jetildirý – ustaz qolynda. Osy maqsattarǵa jetý úshin ári qaraı jumys isteý, sheber muǵalim bolý ár pedagogtyń ózine baılanysty.
Sáýle BÚRLENOVA,
№40 negizgi mekteptiń qazaq tili páni muǵalimi
QARAǴANDY