Bıyl memlekettik sot oryndaýshylardyń sany 30 paıyzǵa qysqartyldy. Bul týraly Ortalyq kommýnıkasııalar qyzmetinde «Ult josparynyń 27-qadamy aıasynda zań ústemdigin qamtamasyz etý» taqyrybynda ótken baspasóz máslıhatynda Ádilet mınıstrligi sot aktilerin oryndaý departamenti dırektorynyń mindetin atqarýshy Ernar Ybyraev málim etti.
Onyń aıtýynsha, 2016 jyldyń qańtarynan bastap jeke sot oryndaýshylardyń quzyretine memleketten óndirý, memleket paıdasyna 1000 AEK-ten astam (2 mln 120 myń teńgege jýyq) somany óndirý, memleket múddesin kózdeıtin jer ýchaskelerinen kóshirý, úılerdi buzý, jer ýchaskelerin alyp qoıýdy qospaǵanda, ózge atqarýshylyq qujattardyń barlyq sanattaryn oryndaý berildi.
«Qazirgi tańda jeke sot oryndaýshylardyń sany 1348 adamdy quraıdy, olardyń kómekshilerin qosqanda, jeke sot oryndaý jumystaryna 4 myńǵa jýyq adam jumyldyrylǵan, – dep atap ótti E. Ybyraev. – Bıyl memlekettik sot oryndaýshylar sany 30%-ǵa qysqartyldy. Sondaı-aq, 2017 jyly olardyń taǵy 30%-yn jáne 2018 jyly 15%-yn qysqartý josparlanyp otyr. Nátıjesinde 518 ǵana memlekettik sot oryndaýshyny qaldyrý kózdelýde».
Aıta keteıik, 2016 jyly jeke sot oryndaýshylar óndirisinde 2 mln-ǵa jýyq atqarý óndirisi boldy, bul memlekettik sot oryndaýshylardyń kórsetkishinen 1,2 mln-ǵa artyq. Aldyn ala esepter boıynsha, jyl saıyn shamamen 550 mln teńge únemdelip, 250 mln teńgege jýyq qarajat áleýmettik mańyzdy sanattar boıynsha jeke sot oryndaýshylaryn qarjylandyrýǵa baǵyttalatyn bolady.
«Qabyldanǵan sharalardyń nátıjesinde jeke sot oryndaýshylar ınstıtýtynyń berik negizi qurylyp, tek jeke oryndaýǵa ótý múmkindigi týyndaıdy», – dedi ol sóziniń sońynda.
Aıdar О́RISBAEV,
«Egemen Qazaqstan»