Búgin elimizdiń agrotehnıkalyq ýnıversıtetteriniń jetekshileri men aýyl sharýashylyǵy mamandarynyń Qytaı Halyq Respýblıkasyna arnaıy sapary aıasynda Jáńgir han atyndaǵy Batys Qazaqstan agrarlyq-tehnıkalyq ýnıversıteti men Soltústik Batys aýyl sharýashylyq, orman sharýashylyq ǵylym-tehnıka ýnıversıtetiniń arasynda ózara kelisim týraly memorandým jasasty. Bul týraly Aýyl sharýashylyǵy mınıstrliginiń baspasóz qyzmeti habarlady.
Memorandýmnyń basty maqsaty – ǵylymı-zertteý jáne bilim berý salasyndaǵy taraptardyń kezeńdik jáne júıeli túrde tájirıbe almasýyna jáne yntymaqtastyqqa járdemdesý.
Onyń aıasynda, professorlyq-oqytýshylar quramy, doktaranttar, magıstranttar men stýdentterdiń akademııalyq utqyrlyǵyn damytý, izdenýshilerge ǵylymı, pedagogıkalyq jáne zertteý taǵylymdamalarynan ótýge járdemdesý, almasý barysynda stýdentterdiń oqý úrdisinde alǵan kredıtterin ekijaqty taný, ózara múmkin bolatyn bilim berý baǵdarlamalaryn jáne eki dıplomdy bilim berýdi damytý úshin ýnıversıtetterdiń ǵylymı jáne bilim berý múmkinshilikterin paıdalaný sekildi t.b. mindetter qarastyrylǵan.
Budan bólek, bilim berý men ǵylymnyń ózekti máseleleri boıynsha birlesken sımpozıýmdar, halyqaralyq ǵylymı-praktıkalyq konferensııalar men semınarlar uıymdastyrý, ortaq ǵylymı-zertteý baǵdarlamalary men jobalardy qolǵa alý josparlanýda.