Bıyl 3-4 jeltoqsanda Qazaqstan Respýblıkasy Memlekettik Ortalyq mýzeıi men «Baqyt» sándik-qoldanbaly óner ortalyǵy dástúrli «Shyǵys bazary» atty Ortalyq-Azııalyq qolóner kórme-jármeńkesin ótkizedi.
Ortalyq Azııa elderi qolónershileriniń kórme-jármeńkesi jyl saıyn Táýelsizdik kúni men jańa jyl qarsańynda ótkizilip keledi.
Qazaqstan, Qyrǵyzstan, О́zbekstan, Tájikstan, Túrkimenstan jáne Reseı elderinen kelgen qolóner sheberleri Almaty turǵyndary men qonaqtaryna ózderiniń týyndylaryn usynady.
Olar – jibek matadan tigilgen kıimder, qoldan toqylǵan bókebaılar, aǵashtan, metaldan oıyp jasalǵan kádesyılar men turmystyq zattar, jibek jiptermen toqylǵan kesteler, Rıshtan qyshtary, zergerlik áshekeı buıymdar, kilemder, ulttyq kıimder jáne taǵy da basqa kóptegen qolóner buıymdary.
Bul kúnderi sondaı-aq, qazaqstandyq belgili sýretshi Gúlnár О́mirbekovanyń jibekke órnek salý ádis-tásilinen ótkizetin sheberlik-sabaqqa qatysyp, sándik-qoldanbaly ónerdiń atalǵan túrin meńgere alady.