Qazaqstandaǵy Kýba elshiliginde Fıdel Kastronyń qaıtys bolýyna baılanysty kóńil aıtý kitabyn ashty, dep habarlady Today.kz.
Kýba Respýblıkasynyń tótenshe jáne ókiletti elshisi Karlos Enrıke Valdes Konsepsıon qazaqstandyqtarǵa óziniń alǵys sózderin bildirdi.
«Bizdiń bas qolbasshymyz Fıdel Kastroǵa degen jyly kóńilderi úshin Qazaqstan halqyna ózimniń alǵysymdy bildirgim keledi. Qolbasshymyz qaıtys bolǵannan keıin bizge júzdegen hattar kelip tústi. Onyń alǵashqysy, Nursultan Nazarbaevtan kelgen kóńil aıtý jedelhaty. Al kóńil aıtý kitaby 28 qarashadan 4 jeltoqsanǵa deıin ashyq bolady. 4 jeltoqsan – Fıdel Kastrony jerleý kúni», – dedi elshi.
Akademık, jazýshy, «Qazaqstan-Kýba» dostyq qoǵamynyń birinshi vıse-prezıdenti, Baqyt Rústemov elshilikke arnaıy kelip, Kýba halqyna kóńil aıtty. Ol Bostandyq araly týraly tórt kitap jazǵan.
Jazýshynyń aıtýynsha, kitap jaryqqa shyqqannan keıin, latynamerıkalyqtar ony qazaqtyń Hrıstofor Kolýmby degen.
«Kýba basshysy Raýl Kastroǵa, Qazaqstandaǵy Kýba elshiligine, Kýba halqyna, búkil progressıvti adamzatqa jáne onyń otbasyna kóńil aıtamyn. Ol sırek kezdesetin basshylardyń biri. Fıdeldi ımperıalıster 637 ret óltirmekshi bolyp, daıyndyq jasaǵan. Kishkentaı ǵana Bostandyq araly Kýba halqyn qanaýǵa jáne tonaýǵa tyrysqandarǵa qarsy turyp, óziniń múddesin, táýelsizdigin qorǵaýda álemge eren úlginiń belgisin kórsetip jatyr», – dedi Baqyt Rústemov.