Táýelsizdik – egemen el bolýmen qatar, ýaqyt kóshiniń túrli shaıqalysynda ultymyzdyń túıilgen júginen sýsyp túsip, ár ótkelde shashylyp qalǵan qundy dúnıe, asyl qazynalarymyzdy qaıta terip, bolashaqqa amanattaýǵa berilgen múmkindik.
Abaı atyndaǵy Qazaq ulttyq pedagogıkalyq ýnıversıteti Tarıh jáne quqyq ınstıtýtynyń Táýelsiz Qazaqstannyń 25 jyldyǵyna oraı ótkizgen «Táýelsiz Qazaqstan jáne álemdik qoǵamdastyq» atty halyqaralyq ǵylymı-praktıkalyq konferensııasy elimiz táýelsizdik alǵan kezdegi tarıhı múmkindikti qalt jibermeı, ult qundylyqtaryn túgendeýge kirisken tarıhshylar eńbegine arnaldy.
«Álemdik qoǵamdastyqta ózindik orynǵa ıe bolǵan Qazaqstan álemdik saıasattyń bir múshesi ǵana emes, bir sýbektisi de bolyp úlgerdi. Ishki saıasat jetistikterinen syrtqy saıasat jetistikteri áldeqaıda qomaqty desem, artyq aıtpas edim. Bizge qazir syrtqy saıasat úlken paıda ákelip otyr. Reseı, Qytaı, AQSh sııaqty iri derjavalarmen ǵana emes, Ortalyq Azııa elderimen de, Eýropamen de qarym-qatynasty jolǵa qoıa bilý kez kelgen memleket basshysynyń qolynan kele bermeıtin is», degen professor Saıyn Borbasov Qazaqstannyń syrtqy saıasatynyń negizgi basymdyqtaryna toqtalyp ótti.
Tarıh jáne quqyq ınstıtýtynyń dırektory, professor Bolat Jumaǵulov, akademık Qaırat Isaǵalıev, tarıh ǵylymdarynyń doktory Ázimbaı Ǵalı, osy oqý ornynyń magıstranttary men oqytýshylary, stýdentteri, ǵylymı ınstıtýttardyń, qoǵamdyq uıymdardyń basshylary qatysqan halyqaralyq konferensııa qazaq, orys jáne aǵylshyn tilderinde júrgizildi.
«Qazaqta «Elý jylda el jańa» degen sóz bar. Biz «25 jylda el jańa» desek, artyq aıtpaspyz. Oǵan 90-shy jyldardan beri elimizdiń qanshalyqty ózgergeni dálel. Elimizdiń árbir azamaty qasıetti táýelsizdiktiń qadirin bilýge tıis», dep túıindedi konferensııa jumysyn QazUPÝ prorektory Ǵabıt Kenjebaev.
Mıra BAIBEK,
«Egemen Qazaqstan»
ALMATY