Sonymen, fermerlerge aýyl sharýashylyǵy kooperatıvterine kirýdiń artyqshylyǵy nede? Bul týraly búgin Úkimet otyrysynda Premer-Mınıstrdiń orynbasary – Aýyl sharýashylyǵy mınıstri Asqar Myrzahmetov baıandady.
A.Myrzahmetovtiń aıtýynsha, elimizdiń árbir fermeri aýyl sharýashylyǵy kooperatıvi arqyly memlekettik qoldaý taba alady. Al kooperatıvterdi tehnıkalyq jaǵynan jabdyqtaý «KazAgro» UBH arqyly júzege asyrylady. JQSh boıynsha veterınarlyq, agrohımııalyq, qarjylyq, jáne ónimdi ótkizý boıynsha ketken shyǵyndary kooperatıvterdi sýbsıdııalaý boıynsha beriledi. «Aýyl sharýashylyǵy kooperatıvin damytsaq, 500 myń usaq óndirýshini tartý jáne ónimderdi ótkizý men óńdeýdiń pármendi júıesin qura alamyz jáne shıkizatpen qamtamasyz etetin kásiporyndardyń úlesi 1,3 esege artady», – dedi mınıstr.
Sonymen qatar, aýyl sharýashylyǵy kooperasııasyn damytý barysynda aýyl turǵyndarynyń kirisin jyl saıyn 300 mlrd teńgege deıin arttyrý jáne saýdanyń ústeme baǵasyn 15-20%-ǵa tómendetý kózdelip otyr.
Oılap qarasak, jyl saıyn 300 mlrd teńge aýyldarǵa qosymsha kiris retinde kirip otyrsa, bul kórsetkish bólingen sýbsıdııa kóleminen eki esege artyq.
Sonymen qatar, kooperatıvter ózderiniń úleskerlerine, ıaǵnı qosalqy sharýashylyq pen usaq sharýa qojalyqtaryna veterınarlyq, agrohımııalyq, tehnıkalyq qyzmet kórsetý jáne jem daıyndaý boıynsha birneshe qyzmetter kórsete alady.
Mysaly, aýyl adamdarynyń maly úshin shóp qajet boldy delik. Onyń quny jazǵy ýaqytta 20 myń teńgege, kúzde 30 myń teńge, qysta 40 myń teńgege deıin qymbattaıdy. Al kooperatıv memlekettiń qoldaýymen lızıng arqyly satyp alynǵan traktor, shóp shabatyn mashına, tirkemelerdi paıdalanyp, arzan baǵamen shóppen qamtamasyz ete alady. Kooperatıv aýyl turǵyndaryn bir ortalyqtan qurama azyqpen qamtamasyz etedi.
Kooperasııanyń taǵy bir artyqshylyǵy – agroóndiristik maqsatta jáne aýyl sharýashylyǵyna qatysty emes bıznes túrlerin (monsha, shashtaraz jáne t.b) ashýǵa nesıe berý qarastyrylǵan. Sonymen qatar, kooperatıv arqyly kúndelikti tutynatyn nesıe alýǵa da bolady. Aýyl turǵyndaryna nesıe alý úshin bankke nemese aýdan ortalyǵy men oblystarǵa baryp júrýdiń qajeti bolmaıdy.
Dınara BITIKOVA,
«Egemen Qazaqstan»