Ortalyq kommýnıkasııalar qyzmetinde Isker áıelder qaýymdastyǵynyń «Qazaqstandaǵy genderlik saıasat: «Qazaqstan Respýblıkasynyń 2006-2016 jyldarǵa arnalǵan genderlik teńdik strategııasyn» iske asyrý nátıjelerin baǵalaý» jobasynyń qorytyndysyna arnalǵan brıfıng ótti.
Oǵan Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń múshesi Raýshan Sársembaeva, Qazaqstannyń Isker áıelder qaýymdastyǵynyń joba úılestirýshisi Gúlzat Temirbaeva, «Azamattyq bastamalardy qoldaý ortalyǵy» kommersııalyq emes AQ tóraǵasy Nurlan О́teshev pen Astana qalasy tájirıbelik psıhologııa men psıhoterapııa jónindegi Eýrazııa ınstıtýty ókildiginiń dırektory Lıýdmıla Kýlıkova qatysty.
Bul jobanyń jumysymen Qazaqstannyń Isker áıelder qaýymdastyǵy Azamattyq bastamalardy qoldaý ortalyǵy men Din isteri jáne azamattyq qoǵam mınıstrliginiń memlekettik granty aıasynda aınalysýda. Ol «Qazaqstan Respýblıkasynyń 2006-2016 jyldarǵa arnalǵan genderlik teńdik strategııasynyń» qorytyndysyn baǵalaý, zorlyq-zombylyqsyz otbasy men elimizde áıelderdi saıası jaǵynan qoldaý maqsatynda iske asyrylýda.
Baspasóz máslıhatynda Raýshan Sársembaeva qazirgi kezde elimizde áıelderdiń quqyn qorǵaý maqsatynda atqarylyp jatqan jumystar men qaýymdastyqtyń aldaǵy josparlary týraly oılarymen bólisti. Ol sońǵy 10 jylda názik jandylardyń turmystyq jaǵdaıy jaqsarǵanyn, olardyń quqyqtaryn saqtaý úshin tıisti jumystardyń jasalǵanyn atap ótti. Degenmen, ol qoǵamda áıeldi áleýmettik qorǵaý máselesi áli de ózekti bolyp otyrǵanyn, byltyr tirkelgen qylmystardyń sany 65 325-ke jetkenin aıtyp, otbasynda áıelderdi qorlaýǵa qatysty qylmystar tirkeletin bolsa, olarǵa zań júzinde kómek berilý kerektigin aıtty.
«Isker áıelder qaýymdastyǵy osy baǵytta jumys isteýde. Sonymen birge, bizdiń uıym alıment tólemeıtin er adamdardy jaýapqa tartý máselesimen aınalysyp jatyr», – dedi ol.
Dastan KENJALIN,
«Egemen Qazaqstan»