Búgin Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysynda Qazaqstan Respýblıkasynyń «2017-2019 jyldarǵa arnalǵan bıýdjet týraly» Zańyn júzege asyrý týraly» Úkimet qaýlysy qabyldandy.
Qujatta 2017 jyldaǵy respýblıkalyq bıýdjet kórsetkishteri, Jumyspen qamtýdyń jol kartasy 2020 baǵdarlamasyn Nátıjeli jumyspen qamtý jáne jappaı kásipkerlik baǵdarlamasyna transformasııalaý aıasyndaǵy sharalardyń júzege asyrylýy kórinis tapty. Erekshe mańyzdy baǵdarlamalardy júzege asyrýǵa baǵyttalǵan basymdyqqa ıe respýblıkalyq bıýdjet ınvestısııalarynyń tizimi bekitilgen, Qazaqstan Respýblıkasy Úkimetiniń aǵymdaǵy transfertteri men rezervteri rettelgen.
Bıýdjet baǵdarlamalarynyń jekeleı ákimshilerine maqsatty aǵymdaǵy transfertterdi paıdalaný jáne ony retteý tártibin jasaý týraly tapsyrma berildi. Qujatta kórsetilgendeı, jobalardy júzege asyrý Qazaqstan respýblıkasynyń 2016 jylǵy 29 qarashadaǵy «2017-2019 jyldarǵa arnalǵan bıýdjet týraly» Zańynda kórsetilgen qarjydan bólek shyǵyndardy qajet etpeıdi.
Eske sala keteıik, osynyń aldynda Memleket basshysy «2017-2019 jyldarǵa arnalǵan bıýdjet týraly» Zańǵa qol qoıdy. Bul Zań elimizdiń áleýmettik-ekonomıkalyq damýynyń makroekonomıkalyq kórsetkishterin naqtylaýǵa baǵyttalǵan.
Arnur ASQAR, "Egemen Qazaqstan".