Qostanaı oblysyndaǵy 12 myń turǵyny bar Qashar kentine kópten kútken kógildir otyn keldi, dep habarlaıdy QazAqparat.
Bul eldi mekendi gazdandyrý «QazTransGaz» AQ ulttyq operatorynyń «Qostanaı oblysy eldi mekenderin gazdandyrý jáne gaz bólý jelilerin jańǵyrtý» ınvestısııalyq jobasyn iske asyrý aıasynda múmkin boldy. Sonymen, kentishilik gaz qubyrlaryn, avtomattandyrylǵan gaz bólý stansasy, eki gaz retteıtin pýnkt, 30 shaqyrymnan astam gaz qubyry salynyp, iske qosyldy. Saltanatty sharaǵa Qostanaı oblysynyń ákimi Arhımed Muhambetov pen «KazTransGaz Aımaq» AQ bas dırektorynyń birinshi orynbasary Ǵalym Aıdosov qatysty. Qasharda 56 iri paneldi úı, budan basqa qosylýǵa ázir 20-dan astam jeke turǵyn úıler bar. Kentte 35 kommýnaldyq-turmystyq, áleýmettik nysandar jumys isteıdi. Qostanaı oblysynyń ákimi Arhımed Muhambetovtiń aıtýynsha, jobany iske asyrýdyń oblys úshin úlken áleýmetttik-ekonomıkalyq mańyzy bar.
«Gaz halyq, ondaǵan áleýmettik jáne óndiristik nysandar úshin qoljetimdi bolady», - dedi oblys ákimi. Sondaı-aq, ol: «Bul kentiń ekonomıkasyn damytýǵa oń yqpal etip, óndiristik, áleýmettik salany, halyqtyń kóshi-qonynyń odan ári damýy úshin perspektıva qalyptastyrady. Biz bul jumysty osy jerde jumys isteıtin, otbasy quratyn, týǵan kentin damytatyn keleshek urpaq úshin júrgizip jatyrmyz», – dedi.