Búgin Jalpyulttyq telekópir barysynda QR Prezıdenti Nursultan Nazarbaev Batys Qazaqstan oblysyndaǵy bekire balyǵy men onyń ýyldyryǵyn óndiretin keshen jumysymen tanysty, dep habarlady QazAqparat.
«Asa qurmetti, Nursultan Ábishuly! Myna keshende bekire balyǵy men onyń qara ýyldyryǵyn óndiremiz. Bul kazirgi zamanǵy talaptarǵa saı tuıyqtalǵan sýdaǵy óndiris. Balyq shabaǵynyń ósýine erekshe jaǵdaı jasalǵan. Bekire ýyldyryǵy jańa tásilmen alynady jáne óńdeledi. О́nim halyqaralyq dárejede sertıfıkattalyp, eksportqa shyǵarylady. Bizdegi ónimdilik balyqty ashyq aıdyndarda ósirgen sharýashylyqtarǵa qaraǵanda 4 ese artyq. Muny sizge maqtanyshpen aıta alamyz!» - dedi Batys Qazaqstan oblysynan baılanysqa shyqqan «Akvamádenıetterdi tájirıbelik-ónerkásiptik óndirisi oqý-ǵylymı kesheni» JShS-nyń aksıoneri Qaırat Mamıev.
«Biz qazir mine bekire balyqtaryn ósirýdemiz. Odan ýyldyryq alýdamyz. Ol jaqsy, kerekti óndiris sanalady», - dedi Nazarbaev óz kezeginde.