Kaspıı teńiziniń qazaqstandyq sektoryndaǵy kenishtiń biri –Qashaǵannan munaı óndirile bastady. Qazirgi ýaqytta munda táýligine 75 myńnan astam barrel munaı kommersııalyq deńgeıde óndirilýde. Aldaǵy ýaqytta munaı óndirýdiń deńgeıi arttyrylyp, táýligine 180 myń barrel deńgeıine turaqtandyrý kózdelip otyr.
Energetıka mınıstrliginiń baspasóz qyzmeti taratqan málimetke sáıkes aǵymdaǵy jyldyń sońyna deıin 1 mln.tonna munaı jáne 680 mln tekshe metrge jýyq gaz, al 2017 jyly – 8,9 mln. tonna munaı jáne 5,6 mlrd. tekshe metr gaz óndirý josparlanýda. Budan keıin jylyna 13 mln.tonna munaı jáne 9 mlrd. tekshe metrge deıin gaz óndirýdi arttyrý jospary bar.
Qashaǵandy ıgerýdiń nátıjesinde álemdik standarttarǵa saı keletin otandyq teńiz servıstik ınfraqurylymy qalyptasty. Shlıýmberje, Sımens, Enerdjı Výd Grýpp, Saıpem sekildi halyqaralyq kompanııalar óz bilimderi, tehnologııalary jáne tájirıbelerimen 70-ge jýyq birlesken kompanııalardyń qurylýyna áriptestik tanytty.
Qazirgi kezde Qashaǵan jobasynda Qazaqstan ıeligindegi úlesi 50%-dan astam 274 kompanııa jumys jasaıdy. 180 asa qazaqstandyq kompanııa oqýdan ótip, halyqaralyq standarttar boıynsha sertıfıkattaldy.
Qashaǵan jobasyna baılanysty qurylǵan konsorsıým Mańǵystaý jáne Atyraý oblystarynyń áleýmettik jáne ınfraqurylymdyq damýyna 500 mln. AQSh dollarynan astam qarajat bóldi.
Joldasbek ShО́PEǴUL, «Egemen Qazaqstan».