Sıngapýr matematıka, ǵylym men kitap oqý boıynsha bilim salasyndaǵy halyqaralyq reıtıngte top bastap tur, dep habarlady VVS. Sıngapýr bul reıtıngte Eýropa, Avstralııa, Soltústik jáne Ońtústik Amerıkany artqa tastap, birinshi orynǵa shyqty.
Bilim berý jetistikterin baǵalaıtyn halyqaralyq baǵdarlama (Pisa) bul reıtıngti halyqaralyq testileý negizde jasaǵan. Ekonomıkalyq yntymaqtastyq jáne damý uıymy (OESR) basqaratyn tanymal tizimdi jasaý barysynda 70 memlekettiń sońǵy 15 jyldaǵy jetistikteri eskerilgen. Úzdik bestikte Sıngapýrdan basqa Japonııa, Estonııa, Taıvan, Fınlıandııa bar. Al ondyqqa Qytaı: Makao, Kanada, Vetnam, Qytaı: Gonkong, Qytaı: Beıjiń kirgen. Atalǵan uıymnyń bilim salasy boıynsha dırektory Andreas Shleıher Sıngapýr tek jaqsy nátıje kórsetip qana qoımaı, únemi alǵa jyljyp otyratynyn aıtyp otyr.
Al úzdik ondyq tiziminen Azııa elderiniń alda turǵanyn baıqaýǵa bolady. Naqtylap aıtsaq, matematıkadan úzdik jeti memleketter qatarynda Gonkong, Makao, Taıvan, Japonııa, Qytaı, Ońtústik Koreıa bar. Al úsh pán boıynsha jasalǵan bes reıtıngke Azııaǵa kirmeıtin memleketterden tek Fınlıandııa, Estonııa, Kanada men Irlandııa ǵana engen.
Atalǵan reıtıngte AQSh pen Ulybrıtanııa da bıikten kórine almapty. Amerıkanyń kórsetkishteri 25-orynda turǵany týraly AQSh bilim mınıstri Djon Kıng "Bul alańdaýshylyq týǵyzady. Ekonomıkaǵa negizdelgen bilim álemde eń jaqsy jetistikterge jeteleıtini belgili", deıdi. Al Ulybrıtanııa matematıka boıynsha 27-shi, kitap oqýdan 22-shi, ǵylymnan 15-orynǵa jaıǵasqan. Eldiń bilim mınıstri Kırstı Ýılıams: "Biz áli ózimiz qalaǵan deńgeıge jetken joqpyz. Biraq qajetti jumystar atqarylyp jatyr", dep otyr.
Esterińizge sala ketsek, barlyq kórsetkishterden birinshi oryn alǵan Sıngapýr táýelsizdigin 1965 jyly ǵana alǵan. Kishkentaı ǵana memleket ekonomıkasy men ómir súrý deńgeıin arttyrý úshin bilimge qatty den qoıyp otyr. Sıngapýr Ulttyq ınstıtýtyndaǵy tehnologııalyq ýnıversıtettiń vıse-mınıstri professor Sıng Kong Lıdiń aıtýynsha, buǵan bilim berý salasyndaǵy ustazdardyń deńgeıi áser etken. "Sıngapýr oqý prosesinde eń úzdik túlekterdi bilim berý salasyna tartady", deıdi ol. Iаǵnı, muǵalimder qataryna memleket boıynsha oqýdy úzdik bitirgender alynady. Sonymen qatar barlyq ustazdar Ulttyq bilim ınstıtýtynda biliktilikterin arttyrady. Oqýshynyń aldynda ustazdardyń óz bilimine senimdi bolýy da qatty eskeriledi.