Búgin Astana qalasynda «Aýyl» HDPP-nyń uıymdastyrýymen aýyl taqybyryna arnalǵan jas aqyn-jazýshylar arasyndaǵy «Aýylym – altyn tuǵyrym» konkýrsynyń jeńimpazdary marapattaldy.
«Aýyl» partııasy tarapynan Qazaqstan Táýelsizdiginiń 25 jyldyq mereıtoıyna oraı arnaıy uıymdastyrylǵan «Aýylym – altyn tuǵyrym» konkýrsyna shyǵarmalar 1 jyl boıy qabyldanǵan. Sharany «Aýyl» partııasy «QazKontent» AQ-nyń «Ádebıet» portalymen birlesip uıymdastyrdy. Ádebı-onlaın konkýrsyna barlyǵy 219 shyǵarma kelip túsken. Onyń ishinde 18 shyǵarma dramatýrgııa janry boıynsha, 79 týyndy – proza janry boıynsha jáne 122 eńbek poezııa janry boıynsha tirkelgen.
Konkýrsqa kelip túsken shyǵarmalarǵa arnaıy qurylǵan qazylar alqasy baǵa berdi. Qazylar alqasynyń quramynda Parlament Senatynyń depýtaty, jýrnalıst, belgili jazýshy Jabal Erǵalıev, Qazaqstanyń eńbek sińirgen qaıratkeri, jazýshy, dramatýrg Rahymjan Otarbaev, Halyqaralyq «Alash» syılyǵynyń laýreaty, jazýshy dramatýrg Roza Muqanova, jazýshy-ǵalym Joltaı Álmash, aqyn, jazýshy, kompozıtor Erqoja Álqojauly jáne jas aqyn-jazýshylar – Baýyrjan Qaraǵyzuly, Erbol Beıilhan, Talǵat Eshenuly syndy azamattar boldy.
«Aýyl» HDPP-nyń tóraǵasy Á.Bektaev jıyn barysynda: «Saıystyń jarııaly túrde, zamanaýı úlgi – áleýmettik jelide onlaın túrde ótýi – shyǵarmashyl jastarymyzǵa shabyt bitirdi. Elimizdiń ár túkpirinen barlyǵy 220-dan astam jas aqyn-jazýshylar baq synady. Respýblıkalyq deńgeıde ótkizip jatqan konkýrs tipti halyqaralyq deńgeıge deıin kóterildi. Kelip túsken shyǵarmalar arasynda Qytaı, Monǵolııa, О́zbekstandaǵy qandastarymyzdyń týyndylary bar», – dedi.
Aıta ketý kerek, birinshi oryn ıegerine 500 myń teńge, 2 orynǵa 300 myń teńge, 3 orynǵa 200 myń teńge kóleminde syıaqy taǵaıyndalǵan. Sonymen qatar sapaly shyǵarmalardyń óte kóp bolýyna baılanysty qazylar alqasy ár janr boıynsha qosymsha arnaıy júlde taǵaıyndaýǵa sheshim qabyldady.
Barlyq jeńimpazdar arasynan eń úzdik shyqqan shyǵarma ıesine taǵaıyndalǵan «Altyn tuǵyrdy» «Aýyl» partııasynyń tóraǵasy Álı Bektaev tabystady.
Partııa tóraǵasynyń aıtýynsha, osy saıysqa kelip túsken shyǵarmalardyń barlyǵy jınaqtalyp, proza, poezııa jáne dramatýrgııa janrlary boıynsha bólek kitap bolyp, bastyrylyp shyǵarylady.
Poezııa nomınasııasy boıynsha Ularbek Dáleıuly, Dáýren Berikqajy, Adal Qalıuly júldeli boldy. Ilııas Muqaıulyna Tumanbaı Moldaǵalıev atyndaǵy syılyq, Aıjan Tabarakqyzyna Farıza Ońǵarsynova atyndaǵy syılyq, Altynqadys Kúntýǵanulyna Esenqul Jaqypbekov atyndaǵy syılyq berildi.
Proza nomınasııasynda О́mirjan Ábdihalyquly, Maqsat Ramazanuly, Esbolat Aıdabosynuly úzdik dep tanyldy. Kúltegin Aspanulyna Saıyn Muratbekov atyndaǵy, Qanat Ábilqaıyrǵa Táken Álimqulov atyndaǵy, Murat Almasbekulyna Sáken Júnisov atyndaǵy arnaıy júldeler berildi.
Dramatýrgııa nomınasııasynda Manarbek Qydyrbaı, Almas Myrzahmet, Áskerhan Aqtaı júldeli boldy. Asqar Toqpanov atyndaǵy arnaıy júlde Mináıhan Saltanatqa, Qaltaı Muhamedjanov atyndaǵy syılyq Aısulý Joltaıqyzyna, О́zbekáli Jánibekov atyndaǵy syılyq Marjan Ershýge buıyrdy.
Joldybaı BAZAR, "Egemen Qazaqstan".