Maqsat – nátıje bıiginen kóriný

Keshe Beıbitshilik jáne kelisim saraıynda Qazaqstan halqy As­sam­bleıasynyń Qazaqstan Prezıdentiniń 2011 jyldyń 27 qańtaryndaǵy №1144 Jarlyǵymen bekitilgen el Táýelsizdiginiń 20 jyldyǵyn ótkizý jónindegi is-sharalar josparyn iske asyrýǵa arnalǵan respýblıkalyq keńesi ótti. Otyrysqa Prezıdent Ákimshiligi, Assambleıa Hatshylyǵy, respýblıkalyq etno-mádenı birlestikter, QHA-nyń ǵylymı-sarap­ta­ma­lyq keńesi, melekettik organdar, Memlekettik qyzmet isteri agenttigi ókilderi qatysty. Keńes Qazaqstan Táýelsizdigi­niń 20 jyldyǵyn merekeleýdi jú­zege asyrýǵa baǵyttalǵan is-sharalar barysy men qory­tyn­dylaryna, «Táýelsizdiktiń jıyr­ma shyńy» – 20 juldyzdy kún kúntizbesi aıasynda ótetin Assam­blıanyń merekelik is-sharalaryna, onyń ishinde 30 qarasha «Kelisim» jáne 14 jeltoqsan «Memlekettik til» kúnderin ótkizýge daıyndyq máselelerine ar­nal­dy. Keńeske Qazaqstan halqy Assambleıasy Tóraǵasynyń oryn­basary – Hatshylyq meń­gerýshisi Eraly Toǵjanov tór­aǵa­lyq etti. Basqosý barysynda Qazaqstan Respýblıkasy Prezıdentiniń Ákimshiligi Ishki saıasat bóliminiń meńgerýshisi Darhan Myńbaı sóz alyp, Qazaqstan Táýelsizdiginiń 20 jyldyǵyna sáıkes basy qaıyrylǵan jáne jaqyn kúnderi júzege asyrylatyn is-sharalar  tóńireginde óz oı-paıymyn jetkizdi. «Elbasynyń 2011 jyldy, ıaǵnı bıylǵy jyldy Qazaqstan  Táýelsizdiginiń 20 jyldyǵy dep jarııalaǵan Jarlyǵyna sáıkes, «Beıbitshilik pen jasampazdyq­tyń 20 jyly» uranymen ót­ki­zilip jatqan is-sharalar Qazaq­stan halqynyń rýhanı-mádenı toptasýyna, elimizdegi birlik pen yntymaqtyń odan ári nyǵaıýyna zor yqpal etip otyr. Mereı­toı­dy merekeleý Qazaqstan azamat­tarynyń táýelsizdik, memlekettilik, beıbitshilik, turaqtylyq, bostandyq, birlik jáne órkendeý uǵymdarynyń máni men maqsatyn tereńnen túsinýge, el taǵdyry men bolashaqqa jaýapkershilikpen qaraýǵa, Otanǵa degen súıispen­shi­lik sezimin qalyptastyrýǵa negiz bolyp otyr», dedi Darhan Myńbaı. Onyń aıtýynsha, me­reı­toılyq kezeń aıasynda Alma­ty, Astana qalalarynyń, oblys­tardyń ishki saıasat basqarma­lary­men tyǵyz baılanys orna­tylyp, al jyl sońyna deıingi aqparattyq jumystar tizbesi naqty bekitilýi tıis. Budan keıingi kezekte Memleket basshysy N.Nazarbaevtyń tap­syrmalarynyń oryndalýy tý­raly Qazaqstan halqy Assambleıasy Hat­­shylyǵy meńgerýshisiniń oryn­ba­sary L.Prokopenko, al aımaqtyq assambleıalar qyzmeti jaıynda tıisinshe QHA-nyń Al­maty, Jam­byl, Pavlodar, Ońtús­tik Qa­zaqstan oblystary boıyn­sha hatshylyqtarynyń meńgerý­shi­leri Ǵ.Tursynbaı, L.Lysova, J.Jetpisbaev, T.Qurmanbaeva, Koreı memlekettik mýzykalyq komedııa teatrynyń dırektory L.Nı, t.b sóz alyp, Assambleıa stra­tegııasyn ázirleýdiń barysy tó­ńiregindegi óz oılaryn ortaǵa sal­dy. Máselen, QHA-nyń Alma­ty oblysy boıynsha hatshy­ly­ǵynyń meńgerýshisi Ǵabıt Tur­synbaı mereke mereıin asqaqtatý maqsatyndaǵy is-sharalar mańy­zy­na toqtaldy. «Elimiz óz ta­rıhynyń jańa betin ashqaly otyrǵan ýaqytta atqarylǵan isimizdi ekshep, esep berýimiz óte mańyzdy. Sebebi, 20 jyl bederinde elimizdiń qoǵamdyq-saıası ómirinde úlken ózgerister boldy. Almaty oblysynda Elbasynyń 2011 jyldy Qazaqstan Táýel­siz­diginiń 20 jyldyǵy dep jarııalaý týraly Jarlyǵy júıeli oryn­dalýda. Assambleıa strategııasyn, El birligi doktrınasyn júzege asyrý úshin jumsalatyn qarjy kólemi de ulǵaıyp otyr. Osydan nebary 5-6 jyl buryn oblystyq assambleıanyń bıýdjeti 5 mln. teńge tóńireginde bolsa, bul kúnde 50 mln-nan asyp, 10 esege artty. Bul da táýelsizdiktiń jemisi», dedi Ǵ.Tursynbaı. Osylaı deı kele, ol oblys boıynsha atqarylǵan jumystar shoǵyry jaıly baıandady. Keıbir ob­lystardaǵy aýdandar men qala­larda ıdeologııalyq jumystardy atqaratyn burynǵy mádenıet, ishki saıasat jáne tilderdi damytý bólimderiniń qysqartylyp, bir ǵana bólimge birigýi nátıjesinde týyndaǵan kedergiler, aımaqtar­daǵy «Dostyq» úıleriniń jumy­syn júıelendirý, bir ortalyqtan qarjylandyrý sııaqty máseleler túıinin tarqatý jónindegi usynys-tilegin jetkizdi. Jıyn sońynda eldik mereı­toıdy joǵary deńgeıde ótkizýde saıası-uıymdastyrýshylyq jáne aqparattyq-ıdeologııalyq ju­mys­tardyń mańyzy aıryqsha ekeni atap ótildi. Keńeste oǵan qatysýshylar etnosaralyq kelisim men qoǵam­dyq turaqtylyqty nyǵaıtý boı­ynsha QHA-nyń memlekettik organdarmen ózara yqpaldastyǵy, etnosaralyq qatynastar salasyn jandandyrý, memlekettik organdar men azamattyq qoǵam ınstı­týttarynyń ózara is-qımylynyń tıimdiligin arttyrý sekildi má­selelerdi talqy tarazysyna sal­dy.  Belesti jyldar bederine kóz júgirtti. Láıla EDILQYZY.