О́tken aptada TMD qalalary arasyndaǵy halyqaralyq baıqaýdyń jeńimpazy, elimizdiń batystaǵy qaqpasy Oral qalasynyń kúni keń aýqymda atalyp ótti. Búginde qaı shahardyń merekesi ótpeı jatyr. Qudaıǵa shúkir, qazir respýblıkanyń qaı qalasynda da mereke-dýman barshylyq. Bul qazir eshkimge tańsyq emes, árıne. Bizdiń aıtaıyn degenimiz de osyndaı shyraıly sharanyń ótkenin jelpildetý emes-ti.
Gáp múldem basqada. Iаǵnı, atalǵan baǵdarlama aıasynda Oral qalasynyń ákimi Samıǵolla Orazov áke degen qurmetti atty abyroımen alyp júrgen, ári esimderi qala, oblys kólemine keńinen tanymal Meńjan Abdrahmanov, Satybaldy Taspıhov jáne Saǵyn Jubanyshev esimdi azamattarǵa «Áke dańqy» tósbelgisin tapsyrdy.
Bul sheshim Oral qalasy ákimdiginiń arnaıy qaýlysyna sáıkes qabyldanypty. Atalǵan qaýlynyń tarmaqtary men erejelerine sáıkes tósbelgi úsh jáne odan da kóp ul-qyzdy dúnıege ákelip, tárbıelep ósirgen otbasy ıelerine berilmek. Kez kelgen otbasy úshin ákeniń orny men róli qashanda bólek ekeni belgili. Áke – qamqorshy, asyraýshy. Áke – asqar taý ekenine eshkimniń talasy joq shyǵar. Otbasylyq qarym-qatynasta kóp jaǵdaıda analardyń róli birjaqty dáriptelip, ákeler tasada qalyp qoıyp júrgeni de jasyryn emes.
Sondyqtan da qoǵam men memleket tarapynan bir kezek ákelerge de nazar aýdarǵannyń esh artyqshylyǵy bolmas edi. Mundaı qadam otbasynyń dińgegi odan ári qataıa túsýine septigin tıgizeri haq. Osy turǵyda Oral qalalyq ákimdiginde qabyldanǵan arnaıy qaýly tek quptaýǵa, qoldaýǵa laıyqty. Oral qalalyq jumyspen qamtý basqarmasynyń bastyǵy Aıgúl Tókesheva gazet tilshisine málimdegendeı, «Áke dańqy» tósbelgisi ekiniń birine berile bermeıdi. Oǵan tek laıyqtylar ǵana tańdalyp alynady. Birinshi kezekte qalanyń qoǵamdyq-saıası ómiri men kóp salaly sharýashylyǵyna belsene aralasyp júrgen azamat-ákeler, óz perzentterin oqý men sportqa jáne ónerge beıimdeı bilgen ónegeli otbasy ıeleri tósbelgige ıe bola alary anyq.
Taǵy bir aıtarymyz, kóp balaly ákelerdi yntalandyrý jónindegi Oral qalasy ákimdiginiń qaýlysyna sáıkes «Áke dańqy» tósbelgisine ıe bolǵandar kommýnaldyq tólemderdi tóleýden bosatylmaq. Sóz joq, bul aıtarlyqtaı áleýmettik jeńildik ekeni anyq. Mundaıda bárekeldi demegende, ne demekpiz.
Temir QUSAIYN.
Oral.