Qazaqtyń Muhtar Áýezov atyndaǵy memlekettik akademııalyq drama teatrynyń ártisteri Jambyl oblysyna gastroldik saparmen keldi.
«Kelgenshe qonaq uıalady, kelgen soń úı ıesi uıalady», demekshi, oblys kórermenderi tarapynan rýhanı qoshemetke bólengen halyq ártisteri Sábıt Orazbaev, Torǵyn Tasybekova, Tuńǵyshbaı Jamanqulov jáne atalmysh teatr dırektory Esmuhan Obaevty oblys ákimi Qanat Bozymbaev jyly shyraımen qabyldady. Oblystaǵy áleýmettik-ekonomıkalyq oń ózgeristerdi baıandaı kelip, oblys basshysy bıyl oblystyq teatrdyń qasbeti jóndelip jatqanyn, al kelesi jyly óner shańyraǵy kúrdeli jóndeýden tolyqtaı ótetinin áńgimeledi.
О́ńirdegi óner men mádenıetke degen qamqorlyq munymen de shektelmepti. Ústimizdegi jyly oblysta tuńǵysh ret ult aspaptar orkestri dúnıege kelse, Taraz memlekettik pedagogıkalyq ınstıtýty janynan mádenıet jáne óner kolledji ashylǵan. Sondaı-aq, tarazdyq talanttardyń sheberlikterin shyńdap, jańa baǵytta jumys isteý úshin «Art-MIX» óner semınary ótkizilgen. Oǵan belgili rejısserler Iý.Hanınga-Beknazar, B.Atabaev, qylqalam sheberi A.Meńlibaeva, horegraf G.Ǵabbasova, teatr zertteýshisi J.Jantórına kelip, sahna, sýret, bı ónerine den qoıǵan áriptesterimen sheberlik bólisken. Taraz qalasynda ótken sýretshilerdiń halyqaralyq sımpozıýmyn da ónerdiń órkenıetke umtylýynyń jaqsy úrdisi dep qabyldaǵan jón.
Myń ret estigennen, bir ret kórgen artyq. Ataqty «ákemteatr» el ishine kelip, onyń Sábıt Orazbaev syndy sańlaqtary oınaǵan spektaklin bir ret bolsa da kórgen artyq. Sondyqtan oblys basshysy Qanat Bozymbaev ártisterdi qabyldaýmen birge, sahna sheberleriniń ónerin tamashalaýǵa da ýaqyt bóldi. Sóıtip, qyrǵyz rejısseri B. Jakıevtiń «Júreıik júrek aýyrtpaı» dep atalatyn dramasynyń basty qaharmanyn somdaǵan Sábıt Orazbaevtyń ónerine kórermenmen birge rızashylyqpen qol soqty.
Kósemáli SÁTTIBAIULY.
Jambyl oblysy.