Prezıdent Ákimshiligi men Premer-Mınıstr keńsesiniń, Mádenıet jáne sport mınıstrliginiń, Syrtqy ister mınıstrliginiń, Aqparat jáne kommýnıkasııalar mınıstrliginiń, IýNESKO jáne ISESKO isteri jónindegi Ulttyq komıssııanyń, Qazaqstan Respýblıkasyndaǵy Birikken Ulttar Uıymynyń (BUU) aımaqtyq ókildiginiń, «Aq Orda» Respýblıkalyq qozǵalysynyń Qurmetti tóraǵasy Qaırat Satybaldyulynyń qoldaý kórsetýimen Ulttyq kitaphana ǵımaratynda bastalǵan Bıennalege ádebıet boıynsha Nobel jáne basqa da syılyqtar laýreattary, belgili jazýshylar, álemniń 20-dan astam elinen ǵylym jáne mádenıet qaıratkerleri, 40-tan astam shet el qonaqtary keldi. Ekonomıkalyq ózara yqpaldastyqty nyǵaıtýmen qatar, ádebıetshilerdiń shyǵarmashylyq áleýetin paıdalana otyryp, qoǵamnyń rýhanı keńistigin keńeıte túsý qajettiligin kórsetýdi maqsat tutqan Halyqaralyq ádebı bıennale EKSPO-2017 kórmesine arnalǵan mádenı is-sharalar toptamasy aıasynda ótkizilýde. Atalmysh shara Qazaqstandy ulttyq mádenıeti men mentalıteti san alýan halyqtardyń bir-birimen tatý turatyn ári dostyq pen rýhanı tutastyqqa ulasqan syndarly baılanystar ornata alatyn qoǵam úlgisi retinde tanyta túspek. 12-14 maýsym aralyǵynda ótetin, «Ortalyq Azııa – Arab álemi: tarıh pen mádenıettiń ózara yqpaldastyǵy» halyqaralyq ǵylymı-tájirıbelik konferensııasy, Bıblıo-tún, «Qoǵamnyń rýhanı jańǵyrýyndaǵy kitaphanalardyń róli», «Ulttyq avtorlardy aǵylshyn tiline aýdarý» atty dóńgelek ústelder, «Maǵan kitap oqyp bershi» halyqaralyq aksııasy, beıresmı áńgimelesý, kitap-ekspozısııalyq jáne fotokórmeler, arnaıy ekskýrsııalyq baǵdarlamalar, álemge tanymal jazýshylarmen kezdesýler sııaqty birneshe baǵdarlamany qamtıtyn Bıennale qorytyndysy boıynsha Álem mádenıeti qaıratkerlerine Úndeý jasalynatyn bolady.
Mıra BAIBEK, «Egemen Qazaqstan»
ALMATY