Kongresti ashqan «Atameken» UKP Isker áıelder keńesiniń tóraıymy Lázzat Ramazanova elimizdiń qazirgi damýynda belsendi qyz-kelinshekterdiń orny barǵan saıyn mańyzdy bola túskendigin atap kórsetti.
«Búginde elimizdiń ishki jalpy ónimin qalyptastyrýdaǵy áıelder qaýymynyń úlesi 40 paıyzǵa deıin jetip otyr. Árbir óńirde isker áıelder keńesi qurylyp, jumys isteýde. Búgingi kongreske qatysyp otyrǵan isker áıelder, ásirese elimizdiń ár aımaǵynan kelgen qyz-kelinshekter er adamdarmen birdeı jumys atqaryp, bıznestegi óz oryndaryn aıqyndaı bildi. Sonyń ishinde oblystardaǵy isker áıelder keńesi ortalyq pen shalǵaı aımaqtardyń arasyn baılanystyrýshy býyn retinde áreket etip keledi. Búginde bıznes-ledı ataýy qoǵam tarapynan qyzyǵýshylyq týdyratyndaı zor mártebege ıe bolýda. Elimizdiń yntaly qyz-kelinshekterin osy qatardan kórinýge shaqyramyn», dedi Lázzat Kerimqulqyzy.
Kongreske «Atameken» UKP Tóralqa tóraǵasy Tımýr Qulybaev qatysyp quttyqtaý sóz sóıledi. Ol áıelder qaýymynyń elimizdegi kásipkerlik salanyń qalyptasyp, damýyna úlken úles qosyp kele jatqandyǵyn atap ótti.
«Atameken» UKP Basqarma Tóraǵasynyń orynbasary Iýlııa Iаkýpbaeva «Qyzmet kórsetý salasyndaǵy MJÁ jobasy mańyzy» týraly baıandama jasap, jan-jaqty áńgimelep berdi.
Kongreste alǵashqylar qatarynda sóılegen Ońtústik Qazaqstan óńirlik isker áıelder keńesiniń tóraıymy, «Asyl Arman» JShS dırektory Alma Arhabaeva bıznes qurýdyń erekshelikterin aıtyp, isker naryqtaǵy ómirsheńdik qaǵıdattaryn tizdi. «Basqarýshylyq – bul óner. Ýaqytty basqarý – bolashaqty basqarý degenimiz bıznesti basqarý, aqparatqa ıe bolý. Basqa adamdardyń ýaqytyn baǵalaý, komandaǵa durys adamdardy tańdaı bilý, otbasy men jumys arasynda teńgerimdi ustaı bilý óte mańyzdy. Qoǵamda áıel isker bolsa, mansap qýsa, otbasyn qura almaıdy nemese basqa isti qurban etý kerek degen pikir bar. Men bul pikirmen kelispeımin. Buǵan óz ómirim men tájirıbemdi mysal retinde keltire alamyn. Meniń bes balam bar. Men olardyń bolashaǵy úshin bızneske aralastym», dedi Alma Arhabaeva.
Onyń aıtýynsha, iskerlikte negizgi tórt qaǵıda bar. Birinshisi – ýaqyt. Ýaqytty durys jumsaı bilýdiń bıznestegi mańyz zor. Ekinshisi – qarjy. Aqshasyz ekonomıkany qalyptastyrý, jeke bıznesti qurý múmkin emes. Úshinshisi – ómir energııasy. Munda densaýlyq pen psıhologııalyq jaǵdaıdy umytpaǵan jón. Tórtinshisi – teńgerim, bárine de teńgerim saqtaǵan abzal.
Basqosýda Shyǵys Qazaqstan oblysyndaǵy isker áıelderdiń óńirlik keńesiniń jetekshisi Elena Berezınskaıa-Abılova ózderiniń az ýaqytta jınaǵan mol tájirıbelerin ortaǵa saldy.
«Shyǵys Qazaqstan oblysyndaǵy isker áıelderdiń óńirlik keńesi 2015 jyly quryldy. Soǵan qaramastan oblystyń bıznes salasyndaǵy qurylymdarymen iskerlik baılanysymyzdy jaqsarta otyryp, kóptegen jumystar tyndyrdyq. Búginde aýdandyq deńgeıdegi 15 keńesimiz jumys isteıdi. Kásipkerlikpen shuǵyldanǵysy keletin jastarǵa kómek kórsetip, tájirıbemizben bólisýdi ózimizdiń basty paryzymyzdyń biri dep bilemiz. Biz ózimizdi áıelderdiń kásipkerlik belsendiligin júzege asyratyn alań retinde qurdyq», dedi ol.
«IDFashhion» halyqaralyq telearnasynyń bas prodıýseri Vasılıı Klımchýk bıznes qurýdaǵy medıa múmkindikterdi aıtty. Telearnanyń basty mıssııasy – qazaqstandyq dızaınerlerge óz qazanynda ǵana qaınamaı, halyqaralyq keńistikten óz oryndaryn alýyna kómek kórsetý. «Biz olarǵa sán áleminiń úlken naryǵyna, feshn keńistigine jol ashamyz. Úlken saýda alańyna, sonymen qatar kıimderdi kóp mólsherde satýǵa múmkindik beretin baılanystarǵa shyǵýǵa kómektesemiz. «IDFashhion» halyqaralyq telearnasy – bul jańa múmkindikter, jańa tanystar, jańa deńgeı», dedi telearna ókili.
Kongress barysynda sondaı-aq, Qazaqstan Prezıdenti janyndaǵy Otbasy jáne áıelder isteri jónindegi ulttyq komıssııasy Tóraıymynyń orynbasary Lázzat Súleımen, «QazGIýÝ» ýnıversıteti» AQ Basqarma tóraǵasynyń orynbasary Nadejda Korobko, Jambyl oblysy Jastar kásipkerligi keńesi ortalyǵynyń dırektory Aınur Záýirbekova, Mańǵystaý oblysy О́ńirlik isker áıelder keńesiniń tóraıymy Sáýle Salıhova sóz alyp, isker áıelderdiń búgingi aıaq alysy jaıly óz oılaryn ortaǵa saldy.
Búginde memlekettik organdarda, shaǵyn jáne orta bıznes salasynda isker áıelder úlesi artyp keledi. Jalpy áıelder qaýymynyń otandyq bıznes ortadaǵy belsendiligi shamamen 50 paıyzǵa jýyqtasa, elimizdiń ishki jalpy ónimin qalyptastyrýdaǵy qosyp otyrǵan úlesteri 40 paıyzǵa jetip otyr. Qazaqstandaǵy áıelder kásipkerliginiń basym bóligi qyzmet kórsetý salasyna baǵyttalǵan, servıstik qyzmet kórsetýdiń 63 paıyzy áıelderge tıesili, aýyl sharýashylyǵyndaǵy kásiptiń 53 paıyzyn názik jandylar basqarýda.
Elimizdiń shaǵyn jáne orta kásipti 697 355 áıel dóńgeletip otyr. Kásipkerlik salasyna qarjylaı emes qoldaý kórsetý boıynsha «Atameken» ulttyq kásipkerler palatasy kásipker áıelderge 17 666 servıstik qyzmet kórsetse, 45 501 aqparattyq qoldaý bildirgen.
Shara barysynda el damýyna súbeli úles qosqan isker áıelder «Atameken» UKP Isker áıelderi keńesi atynan marapatqa ıe boldy.
Suńǵat ÁLIPBAI, «Egemen Qazaqstan»