Qorqyttyń dúnıege kelýi týraly ǵajaıyp syrǵa toly shaqty ańyz-áńgimemen órbite otyryp, Qazaq halyq aspaptary orkestri kúımen kezektestire jyrlady. El men jer, ólim men ómir, máńgi baqyt, óshpes erlik týraly syr shertetin Qorqyt ata kúıleriniń shyǵý tarıhyna baılanysty oqıǵalyq qoıylym ajalmen aıqasqan alyp rýhanı tulǵa kelbetin asha tústi. Qorqyt obrazynyń el birligin nyǵaıtqan kemeńger qaıratker, túrki dúnıetanymynyń negizin jasaǵan ǵulama oıshyl, álemdik aqyl-oı mádenıetinde ózindik orny bar fılosof-gýmanıst retinde beınelenýi qoıylym mazmunyn baıyta túsken.
Ien dalada jalǵyzynyń artynda qalǵan ana men ıesinen aırylǵan tazy – qos muńlyq qosylyp kúńirenedi. Qorqyttyń osy oqıǵaǵa aılanysty shyǵarǵan kúıi «Ushardyń ulýy» kúıimen jalǵasty. Perzentine degen ystyq mahabbatyn kúı tilimen sóıletken danagóıdiń «Áýppaı» kúıi zaldy áldıge bóledi.
Qorqyt rólin QR Jastar odaǵy syılyǵynyń laýreaty Nuraı Tanabaev somdady. Qorqyt kúılerin orkestr repertýaryna laıyqtap, notaǵa túsirgen – Respýblıkalyq baıqaýlardyń laýreaty, kompozıtor Arman Jaıymov.
Budan basqa kóptegen mýzykalyq-teatrlyq baǵdarlamalardy úılestirýde tájirıbesi mol QR eńbek sińirgen qaıratkeri, professor Aıtqalı Jaıymov adamgershilik pen mádenıettilikke tárbıeleýde mýzykanyń róli aıryqsha degendi aıtady.
–Qorqyt ómiri kóz aldymyzdan ótti. Daıyndyq barysynda qobyzben ǵana oryndalyp kelgen týyndylaryn arnaıy orkestrge túsirdik. Kópten beri oryndalmaı júrgen shyǵarmalaryn qaıta jańǵyrtyp, kórermen nazaryna usyndyq. Astanamen birge jasasyp kele jatqan kásibı óner ujymdarynyń biri – Qazaq halyq aspaptary orkestri 1997 jyly qurylǵan. Búginde orkestr quramynda 70 mýzykant bar, – deıdi fılarmonııanyń Qazaq halyq aspaptary orkestriniń kórkemdik jetekshisi ári bas dırıjeri Aıtqalı Jaıymov.
Jyr-tolǵaýlarymyzdy jańasha leppen sahnalap júrgen fılarmonııa ujymy halyqaralyq kórme aıasynda Qazaqstan halyq kompozıtorlarynyń án-kúıleri men shetel kompozıtorlarynyń shyǵarmalary qamtylǵan jıyrmadan astam konsert ótkizýdi josparlap otyr.
Aıa О́MIRTAI,
«Egemen Qazaqstan»