Basqosýda Jeńis Mahmuduly vedomstvonyń atqarǵan jumys nátıjelerin baıandap, aldaǵy josparlar men mindetterge toqtaldy. «Jyl basyndaǵy 4 aıdyń qorytyndysy boıynsha óndiristik ónerkásip kólemi 7,1 paıyzǵa óskenin kóremiz. Onyń ishinde taý-ken óndirý men óńdeý ónerkásipteriniń, tústi metallýrgııanyń ósimderi esebinen qara metallýrgııa men farmasevtıkanyń kirisi ulǵaıǵan», dedi mınıstr. Aımaqtardyń qatysýymen beınekonferensııa rejiminde uıymdastyrylǵan jıynda jasalǵan baıandamada bıyl Indýstrııa 4.0 elementterin engizý aıasynda júıeli sharalar paketin jáne ónerkásipti sıfrlandyrýda memlekettik qoldaý quraldaryn ázirleý jumystary júrgizilgeni aıtyldy. «Byltyrǵy qorytyndy boıynsha tikeleı sheteldik ınvestısııa 40 paıyzǵa ósip, 20,6 mlrd AQSh dollaryn quraǵan. Birlesken jumystardyń nátıjesinde bıyl aqpan aıynda EYDU keńesi Qazaqstannyń EYDU halyqaralyq ınvestısııalar jáne kóp ultty kásiporyndar jónindegi deklarasııasyna qosylýyn, sondaı-aq EYDU ınvestısııa jónindegi komıtetine «qaýymdastyrylǵan múshe» retinde kirýin maquldady», dedi J.Qasymbek. Onyń aıtýynsha, ınnovasııa salasynda ótken jyly jalpy somasy 1,9 mlrd teńgege ınnovasııalyq granttar berý týraly 66 kelisimge qol qoıylypty. Halyqaralyq tehnologııalar transferti ortalyǵynyń yqpalymen Qazaqstanǵa sheteldik tehnologııalardy transferleý boıynsha 15 jobany júzege asyrý qolǵa alynǵan. Irikteý nátıjesinde 4 jobaǵa jalpy somasy 800 mln teńgeniń ınnovasııalyq granty berildi. Memleket basshysynyń bıylǵy Joldaýyn júzege asyrý aıasynda atalǵan ortalyqtyń 2 qanatqaqty jobasyn júzege asyrý josparlanyp otyr. Mınıstr tehnıkalyq retteý jáne metrologııa salasynda EAEO-nyń 40 tehnıkalyq reglamenti bekitilip, 35-i kúshine engenin málimdedi. Standarttaý jónindegi josparǵa sáıkes, 747 ulttyq standart ázirlengen. Qazaqstan Ortalyq Azııa aýmaǵy elderi ishinde birinshi bolyp 58 ólsheý málimetiniń halyqaralyq standarttarǵa sáıkestigin dáleldepti. Mınıstrlik 2016 jyly «Jer qoınaýy jáne jer qoınaýyn paıdalaný týraly» kodeks jobasyn ázirledi. Qazirgi tańda jumys tobynyń qaraýyndaǵy jobany jyl sońyna qaraı qabyldaý josparlanǵan. Kodekstiń qabyldanýy geologııalyq barlaýdyń ınvestısııalyq tartymdylyǵyn arttyryp, otandyq ıýnıorlyq kompanııalardy damytýǵa jáne qosymsha ınvestısııa tartýǵa tyń serpin bermek, sonymen qatar eldegi áleýmettik-ekonomıkalyq ahýalǵa oń yqpal etedi dep kútilýde. «Byltyr kólik salasynda qyzmet kórsetý kólemi 3,8 paıyzǵa ósti. Logıstıka tıimdiliginiń halyqaralyq reıtınginde Qazaqstan 88-orynnan 77- orynǵa kóterildi, TMD-da úzdik boldy. Qytaı – Eýropa – Qytaı baǵytynda tranzıtti konteınerlik tasymal 2 ese ósip, 104,5 myń konteınerdi qurady. bıyl konteınerler sanyn 320 myńǵa, Qytaı – Eýropa – Qytaı baǵyty boıynsha 165 myńǵa arttyrý kózdelip otyr. Tranzıttik avıajolaýshylar sany ótken jyly 250 myńnan 478 myńǵa deıin jetse, 2017 jyly bul sandy 600 myńǵa jetkizemiz. Negizgi jolaýshylar legin Azııadan Qazaqstan arqyly Eýropaǵa jáne keri baǵytqa qatynaıtyndar quraıdy», dedi baıandamashy. 2016 jyly «Nurly jol» baǵdarlamasy aıasynda respýblıkalyq mańyzy bar 920 shaqyrym avtokólik jolynda jóndeý jumystary aıaqtalǵan. Onyń 767 shaqyrymy paıdalanýǵa berildi. Aǵymdaǵy jyly bólingen qarjy esebinen 7 ótpeli jobanyń jumysy jalǵasyp (Astana – Qaraǵandy, Ortalyq-Shyǵys, Beıneý – Aqtaý, Ortalyq – Batys, Qapshaǵaı – Taldyqorǵan, Astana – Petropavl jáne Oral – Kamenka), jyl sońynda sonyń 602 shaqyrymyndaǵy jumys aıaqtalmaq. «Jalpy uzyndyǵy 3,2 myń shaqyrymdy quraıtyn 15 jańa jobanyń qurylysy bastalady. Sóıtip, bıyl 4,4 myń shaqyrym jolǵa jumys júrgizip, 100 myń adam jumyldyramyz», dedi mınıstr. Basqosýda málim bolǵandaı, byltyr jalpy turǵyn úı qurylys alańynyń fızıkalyq kólem ındeksi 118 paıyzdy qurasa, 10,5 mln sharshy metr baspana paıdalanýǵa berilgen. Bul – shamamen 90 myń páter. Investısııa kólemi 2016 jyly 830 mlrd teńgege jetken salada júrgizilgen reformalar nátıjesinde kásipkerler úshin qurylys júrgizýge ruqsat alý merzimi 3 aıdan 1 aıǵa qysqarypty. Osy kórsetkishter nátıjesinde Qazaqstan eki jylda Búkilálemdik bank reıtınginde 152-orynnan 22-orynǵa kóterildi. Aıtpaqshy, «Nurly jer» turǵyn úı qurylysy baǵdarlamasy aıasynda 1,5 mln turǵyn úı salynatyn bolsa, sonyń 100 myńy aǵymdaǵy jyldyń enshisine buıyryp tur.
Ashat RAIQUL, «Egemen Qazaqstan»