Jıyndy ashqan Memlekettik hatshy «Mereıli otbasy» ulttyq konkýrsy Qazaqstan Prezıdenti bastamasymen jyl saıyn ótkiziletindigin aıtty. G.Ábdiqalyqova atap ótkendeı, bıylǵy konkýrstyń mańyzy erekshe, óıtkeni, Memleket basshysynyń «Bolashaqqa baǵdar: rýhanı jańǵyrý» atty baǵdarlamalyq maqalasynyń negizgi erejeleriniń biri – rýhanı qundylyqtardy saqtaý jáne jańǵyrtý. Adam boıynda rýhanı qundylyqtar qalyptastyrýda otbasy ınstıtýtynyń atqaratyn róli zor.
Konkýrs qoǵamdaǵy izgilik pen adamgershilikti, neke jáne otbasy ınstıtýttaryn nyǵaıtýǵa baǵyttalǵan. Ol bıyl tórtinshi ret ótkizilip otyr. Osy jyly baıqaýǵa 2879 otbasy qatysty, ıaǵnı 2016 jylmen salystyrǵanda, olardyń sany 11,6%-ǵa ósti (2016 jyly 2579 otbasy qatysqan). Bul rette qatysýshylardyń 36,2%-y (1041 otbasy) – kópbalaly otbasylar (2016 jyly 1065 bolǵan).
Sonymen qatar, ótken jylmen salystyrǵanda, belgili bir mamandyqpen aınalysatyn áýletter ókilderinen quralǵan otbasylar sany 6,8%-ǵa kóbeıdi (2016 jyly – 483, 2017 jyly – 516) jáne jas otbasylar sany da 6%-ǵa ulǵaıdy (2016 jyly – 472, 2017 jyly – 500). Mamyr aıynda barlyq oblystar men respýblıkalyq mańyzy bar qalalarda aımaqtyq kezeńniń aqyrǵy máredegi jeńimpazdaryn marapattaý saltanatty is-sharalary ótkizilip, tórtinshi – ulttyq kezeńge qatysatyn 2 otbasy anyqtalǵan bolatyn. Otyrysta ulttyq kezeńge qatysatyn 16 úmitker bekitildi.
«Mereıli otbasy» konkýrsynyń fınaldyq kezeńinde jeńimpazdy anyqtaýǵa eldiń barlyq azamattary kaztube.kz saıty jáne SMS-habarlamalar arqyly ınteraktıvti daýys berý ádisimen tikeleı atsalysa alady.
Daýys berý qorytyndysy qyrkúıektiń ekinshi jeksenbisinde – Otbasy kúni qarsańynda shyǵarylady.