Qazaqstan Jazýshylar Odaǵynyń tóraǵasy Nurlan Orazalın, jazýshynyń jary Klara Myńjasarqyzy, fılologııa ǵylymdarynyń doktory, professor Faýzııa Orazbaeva, Rýda Zaıkenova, Gúljahan Orda, Serikqazy Qorabaev bastaǵan qonaqtar eń áýeli qalamger týyp-ósken, keıin esimi berilgen Ádı Sháripov aýylyna at basyn tirep, eldimeken turǵyndarymen kezdesti. Kelesi kúni aýdan ortalyǵy Qalbataýda «Qazaq ádebıetiniń ózekti máseleleri» atty respýblıkalyq ǵylymı-teorııalyq konferensııa ótip, Almatydaǵy M.Áýezov atyndaǵy ádebıet jáne óner ınstıtýty men Shákárim atyndaǵy Semeı memlekettik ýnıversıtetiniń ǵalymdary mazmundy baıandama jasap, tulǵa jaıynda estelikterin aıtty. «Qasıetti ólke, qazynaly óńir – Jarma aýdanynda eliniń, jeriniń dańqyn shyǵarǵan tanymal tulǵalar az emes. Solardyń biri de biregeıi – ádebıetshi ǵalym, qaharman partızan, belgili jazýshy Ádı Sháripov. Ádekeńniń esimi jerlesteriniń, urpaqtarynyń, halqynyń jadynda máńgilik saqtalady. Jazýshynyń týǵan aýyly Ádı esimimen atalyp, aýdan ortalyǵyndaǵy bir kóshege aty berilgeni jerlesteriniń ardaqty ulyna degen qurmeti dep bilemiz. Dara tulǵanyń 105 jyldyǵyna oraı jazýshynyń rýhyna taǵzym ete kelgen qadirli qonaqtarymyzǵa, zertteýshi-ǵalymdarǵa alǵysymyzdy bildiremiz», - dedi Jarma aýdanynyń ákimi Nurlan Sydyqov konferensııanyń ashylý saltanatynda sóılegen sózinde.
Qazaqstan Jazýshylar Odaǵynyń tóraǵasy Nurlan Orazalın qalamgerdiń shyǵarmashylyǵy, sońynda qaldyrǵan muralary, azamattyq bolmysy, kisilik kelbeti jaıynda oı qozǵap: «Ádı Sháripov alashtyń ardaqtylary Muhtar Áýezov, Qudaıbergen Jubanov, Sáken Seıfýllınnen dáris alǵan, Ilııas Jansúgirovpen birge eńbek etken, olardyń qundy muralaryn urpaqqa jetkize bilgen kóregen jan. Ahmet Baıtursynovtyń «Ádebıet tanytqysh», M.Áýezovtiń «Qıly zaman» syndy eńbekterin kóziniń qarashyǵyndaı saqtap, elý jyl ótken soń baspaǵa tapsyrýy erlikpen para-par is» deı kelip, jazýshynyń esimin umytpaı ulyqtap jatqan jerlesterine alǵysyn jetkizdi.
Kóp jyldan beri qalamgerdiń shyǵarmashylyǵyn zerttep júrgen fılologııa ǵylymdarynyń doktory, professor Gúljahan Orda Ádı Sháripov oqý mınıstrligin basqarǵan jyldary qazaq tilindegi bilim ordalaryn qaıta ashýǵa atsalysyp, qazaq tilin órkendetý maqsatynda mektep muǵalimderiniń ádistemelik oqý quraly retinde «Qazaq tili men ádebıeti» jýrnalyn, «Qazaqstan muǵalimi» gazetin shyǵarýǵa muryndyq bolǵanyn tilge tıek etti. Shara sońynda sóz alǵan jazýshynyń asyl jary Klara Jaǵyparqyzynyń áserli sózi jınalǵan jurtshylyqty oıǵa shomdyryp, dara tulǵanyń jarqyn kelbetin bir sát kóz aldaryna elestetkendeı boldy. «Ádekeń týǵan aýyly týraly jıi aıtatyn edi. О́miriniń sońynda qatty naýqastanyp jatyp, týǵan jerine alyp barýymdy ótindi. О́kinishke qaraı naýqasynyń aýyrlyǵyna ári dárigeriniń keńesine baılanysty bul ótinishin oryndaı almadym. Úsh kúnnen soń Ádekeń ómirden ozdy. Men ózim de ótinishin oryndaı almaı qalǵanyma ókinish bildirip, keıin «Aıaýly Ádekem» atty eńbegimdi jazdym. Ádı qazaq ádebıetine kelgen jastardyń bolashaǵyna úlken senimmen qarap, baǵyt-baǵdar berip, aǵalyq aqyl-keńesin aıaǵan emes. Búginde olardyń qazaqtyń marǵasqa uldary bolyp júrgenine maqtanyshpen qaraımyn. Keńestik zamanda solaqaı saıasattyń zardabyn da az tartqan joq, biraq Taıyr Jarokov, Shahmardan Esenov, Jumabek Tashenov syndy el aǵalary rýhanı kúsh berip, árkez qasynan tabyldy. Jazýshynyń 105 jyldyǵyna oraı osyndaı taǵylymdy kezdesý uıymtastyrǵan Jarma aýdanynyń ákimdigine, aýdan basshysy Nurlan Báttashulyna analyq alǵysymdy aıtamyn», - dedi.
Shara aıasynda Almaty men Astanadan, Semeıden arnaıy kelgen zııaly qaýym ókilderi aýdan kitaphanasyna jazýshy jaıynda jazylǵan kitaptaryn tartý etip, bıyl Jarma óńirinde aýdandyq deńgeıde ótken «Ádı oqýlary» keleshekte respýblıkalyq dárejede uıymdastyrylsa degen usynystaryn jetkizdi.
Azamat QASYM, «Egemen Qazaqstan»
Shyǵys Qazaqstan oblysy, Jarma aýdany