Jıynnyń saltanatty ashylýynda sóz alǵan Qytaı Halyq Respýblıkasynyń Qazaqstandaǵy elshiliginiń arnaýly ókili Joý Fan Kýnsol myrza atalǵan is-sharany uıymdastyrýǵa atsalysqan uıym ókilderine shynaıy alǵysyn bildire otyryp, ózara syılastyq pen qurmetke negizdelgen Qytaı men Qazaqstan arasyndaǵy qarym-qatynastar dostyq pen yntymaqqa qurylǵanyn aıtty.
Qazylar alqasynyń quramynda QR Eńbek sińirgen qaıratkeri, sazger Marat Omarov, Qazaqstan «Sýretshiler odaǵynyń múshesi», «Qurmet» ordeniniń ıegeri Aqtoty Kólkeqyzy, «Naz» memlekettik bı teatrynyń kórkemdik jetekshisi, bas baletmeıster Hadısha Ermekbaıqyzy, Astana memlekettik akademııalyq fılarmonııasy «Qorqyt» dástúrli saz tobynyń kórkemdik jetekshisi Sholpan Dildábekqyzy boldy.
Dástúrli ulttyq bı atalymy boıynsha eki elden on bes bala qatysyp, ulttyq sahna óneriniń mártbesin bir asqaqtatty. Ulttyq bı óneriniń dástúri men órnegin saqtaı otyryp, qazaq dúnıetanymyn aıshyqtaıtyn nebir kanondyq bı úlgilerin sahna tórinde kásibılikpen oryndady.
Qazylar alqasynyń múshesi Shalqar Qabdeshulynyń aıtýynsha, sýretshi balalardyń úzdigin anyqtaý ońaıǵa túspegen kórinedi.
– Qatysýshylarǵa erkin taqyrypta jáne «Balalyq shaq» taqyryby boıynsha sýret salýǵa 3 saǵat ýaqyt berildi. Úzdikterdi anyqtaýda taqyryptyń kompozısııalyq turǵydaǵy mazmuny men tehnıkalyq sheberligine nazar aýdardyq. Elder arasyndaǵy mádenı jaqyndyqty arttyra túsetin mundaı sharalardyń mańyzy zor,– deıdi Sh.Qabdeshuly.
Sýret atalymy boıynsha bas júldege ıe bolǵandardyń biri Meıirjan Tólegen Qytaıdyń Shyńjan aımaǵy, Barkól aýdanynan kelgen. Bıyl úshinshi synypqa kóshken Meıirjannyń bul Astanaǵa alǵash ret saparlaýy.
– Erkin taqyrypta men taıdyń sýretin saldym. О́zim jylqy malyn erekshe unatamyn. О́skende úlken sýretshi bolyp, dúnıejúzin tanyǵym keledi. Astananyń halqy óte mádenıetti eken, sapar erekshe unap jatyr, –deıdi kishkentaı sýretshi.
Jalpy irikteý satylarynda qazylar alqasy eń aldymen balalardyń jas aıyrmashylyǵyn basty nazarǵa aldy. Sonymen birge óner kórsetýdegi sheberligi men jańalyǵy aldymen eskerildi. Júldeli oryn alǵan jeńimpazdar men qatysýshylarǵa estelik buıymdar úlestirildi.
Elimizde tuńǵysh ret uıymdastyrylyp otyrǵan shara rýhanı jańǵyrý baǵdarlamalyq is-josparynyń negizinde eki el arasyndaǵy mádenı baılanystardy damytýdy, ásirese ónerli jas órenderdiń arasynda shyǵarmashylyq múmkindikterin shyńdaı túsýdi maqsat etken. Aıtýly sharany «Murat joly» mádenıet qoǵamdyq birlestigi, Qytaı ShÝAR «Jańa juldyz» medıa» JShS, Astana qalasy ákimdiginiń «Oqýshylar saraıy» uıymdastyryp otyr.
Aıa О́MIRTAI,
«Egemen Qazaqstan»