Mereıtoıly velosherý kóptegen kórsetkishter jaǵynan rekord ornatty. Bıyl is-sharaǵa 1500-den asa adam qatysyp, olardyń ishindegi 718 qatysýshy 30 shaqyrymǵa sozylǵan joldy velosıpedpen eńserip ótti. Jınalǵan qarjy somasy 160 mıllon teńgege jetti.
Is-sharanyń ashylýynda QR mádenıet jáne sport mınıstri Arystanbek Muhamedıuly quttyqtaý sózin sóıledi. «Charity Tour de Burabay Qazaqstan Respýblıkasynda velosıped sportyn damytýǵa jáne dáripteýge jaǵdaı jasap, em men ońaltýǵa muqtaj balalarǵa erekshe kóńil bólip otyr», – dedi mınıstr.
«Astana Pro Team» komandasynyń bas menedjeri Aleksandr Vınokýrov izgi bastamanyń júzege asýyna qolǵabys etkenderdiń barlyǵyna alǵysyn bildirdi. «Astana Pro Team» komandasy bul is-sharany jylda keńinen qoldap otyratynyn atap ótý qajet.
Charity Tour de Burabay ıdeıasyna bastama bergen bıznesmen, mesenat jáne «Asyl Mıras» qaıyrymdylyq qorynyń negizin salýshy Bolat О́temuratov velosherýdi ary qaraı da ótkizýge nıetti ekenin jetkizdi. Ol aldaǵy jyldary is-sharanyń aýqymy keńeıip, kóptegen balalar kómekke qol jetkizetinine úmit bildirdi.
Bes jyl ishinde jınalǵan qarjy somasy 14 esege artyp, 463,5 mıllıon teńgeni qurady. Al qatysýshylardyń sany 7 ese ósti. 2017 jyly aýksıonnan 102 900 000 teńge, balalardyń sýretter jármeńkesinen 684 000 teńge jınaldy. Jeke jáne korporatıvtik jarnalar 30 416 000 teńgeden asyp, mesenattardyń janashyrlyq járdemi 26 000 000 teńgege jetti.
«Asyl Mıras» jeke qaıyrymdylyq qory jınalǵan qarjyǵa Petropavl qalasyndaǵy oblystyq balalar aýrýhanasyna, Taldyqorǵan qalasyndaǵy oblystyq perınataldyq ortalyqqa, Oral qalasyndaǵy oblystyq balalar kópbeıindi aýrýhanasyna, Aqtóbe qalasyndaǵy balalar klınıkalyq aýrýhanasyna, sondaı-aq Oral qalasyndaǵy batysqazaqstandyq múgedek balalardyń «Báıterek» oblystyq qoǵamdyq birlestigine arnap medısınalyq jabdyqtar satyp alady.