Osydan 60 jyldan asa ýaqyt buryn osy jerden temir keni tabylyp, soǵan oraı Sokolov-Sarybaı ken óndiristik birlestigi alǵashqy kendi qaza bastaǵanda, qalanyń da irgesi qalanǵan bolatyn. Alǵashqy kezde komsomoldyq joldamamen alyp qurylysqa kelgen jastar, shatyrlarda turdy. Qala aǵa urpaq ókilderiniń kóz aldynda ósti, gúldendi. Qazir qalanyń 130 myń turǵyny bar. Bir ken alyby kásipornynda ǵana 18 myń adam jumys isteıdi.
Qalanyń mereıtoılyq merekesine oblys ákimi Arhımed Muhambetov qatysyp, rýdnyılyqtardy merekemen quttyqtady. «Qala quraýshy Sokolov-Sarybaı ken óndirý birlestiginiń yrǵaqty jumysynyń arqasynda ony qazir tek elimiz ǵana emes, odan tysqary jerler de jaqsy biledi. Elbasy Nursultan Nazarbaev ken kásipornyna, ondaǵy eńbek adamdarynyń ómirine ylǵı nazar salyp otyrady, jaqsylyqtaryna, tabysyna qýanady. Qazir kásiporyn elimizdi ınnovasııalyq damytý baǵdarlamasyna qatysyp otyr, mıllıondaǵan tonna ken óndirýde. Qalada túrli ekonomıkalyq, áleýmettik jobalar júzege asyp jatyr, joldar salynyp, úıler turǵyzyldy. Osynyń barlyǵy da kenshiler qalasynyń elimizdiń gúldenýine qosyp otyrǵan úlesi dep bilemiz», – dedi Arhımed Begejanuly.
Budan keıin oblys ákimi Rýdnyı qalasynyń ósýine, gúldenýine úles qosyp kele jatqan maıtalmandarǵa «Rýdnyı qalasynyń 60 jyldyǵy» medalin tabys etti. Qala merekesi konsertke, rýdnyılyqtar men qonaqtardyń jappaı qydyrýyna, demalysyna ulasty.
Názıra Járimbet, «Egemen Qazaqstan» Rýdnyı