Almatydaǵy Ulttyq kitaphanada Qoǵamdyq mańyzy bar ádebıetti satyp alý, basyp shyǵarý jáne taratý máseleleri boıynsha zııaly qaýym ókilderiniń kezdesýi ótti.
Belgili jazýshy Álibek Asqarov uıymdastyrǵan, elimizge tanymal qalamgerler, ǵalymdar men baspagerler qatysqan jıynda «Mádenıet týraly» Qazaqstan Respýblıkasy Zańyna jaqynda engizilgen ózgeristerge sáıkes, Qoǵamdyq mańyzy bar ádebıetti satyp alý, basyp shyǵarý jáne taratý qaǵıdalary jan-jaqty talqylanyp, anyqtamalar men túsiniktemeler berildi.
Astanadan arnaıy kelgen Mádenıet jáne sport mınıstrliginiń Baspa isi basqarmasynyń basshysy Nurasyl Toǵyzbaev atalmysh qaǵıdalarǵa qatysty avtorlardan buryn jaryq kórmegen shyǵarmalaryn satyp alýdy anyqtaý maqsatynda 15 adamnan turatyn Saraptama komıssııasy qurylǵanyn, sol komıssııanyń ǵalymdar men jazýshylar, jýrnalıster men saıasatkerler, ózge de qalamgerler usynǵan shyǵarmalardyń árqaısysyna jeke-jeke saraptama júrgizip, qorytyndy shyǵaryp otyratynyn jetkizdi. Ol saraptama qorytyndylary satyp alynatyn shyǵarmalardyń tizimin bekitetin Qazaqstan Respýblıkasy Úkimeti janyndaǵy «Qoǵamdyq mańyzy bar ádebıetti satyp alý máseleleri jónindegi Vedomstvoaralyq komıssııanyń» qaraýyna usynylmaq eken. «Osy baǵdarlama boıynsha shyǵatyn kitaptar endi burynǵydaı eki myń emes, bes myń taralymmen shyǵyp, elimizdiń alys túkpirindegi aýyl kitaphanalaryna deıin taralatyn bolady. Taǵy bir eskerer jaıt, buryn taralymy 500 danadan aspaǵan shyǵarmalar da jańa shyǵarma retinde osy baǵdarlama aıasynda jaryq kórýi múmkin», – dedi Nurasyl Toǵyzbaev.
Qalamgerlerdi tolǵandyratyn basty túıinniń biri – qalamaqy máselesi bolsa, endi ony sheshý isi de durys jolǵa qoıylatyn bolypty. Eki birdeı komıssııa súzgisinen ótip, úzdik dep tanylǵan shyǵarmanyń bir avtorlyq baspa tabaǵyna (40 myń belgige) 150 myń teńge kóleminde qalamaqy tólenbek.
Avtorlardyń áleýmettik jaǵdaıyn sheshý úshin jasalyp jatqan qadamdardyń biri bolyp sanalatyn baǵdarlamany júzege asyrý barysynda kitap shyǵarý, taratý jumystary úshin baspalar arasynda ashyq baıqaý ótkizilip, laıyqty baspa tańdalyp alynbaq eken.
Sultanáli Balǵabaev, Maral Ysqaqbaı, Turysbek Sáýketaev, Israıl Saparbaı syndy birqatar ádebıet janashyrlary ádebıettegi urpaq sabaqtastyǵy úshin jasalyp jatqan bul qadamǵa razylyqtaryn jetkize otyryp, tek jylda jańa shyǵarma shyǵarý bastamasy naýqanǵa ulasyp ketpese eken dep tilek bildiristi.
Aıta ketsek, búginginiń jazýshysyna jazýshy ekenin umyttyrmaı, ásirese jas qalamgerlerdiń alǵa umtylýǵa degen yntasyn oıatatyn bul baǵdarlamada jas ereksheligine shekteý qoıylmaǵan, sondaı-aq, kez kelgen adam óz týyndysyn usyna almaq. Ol úshin aǵymdaǵy jyldyń 15 tamyzynan 15 qyrkúıegine deıin ýákiletti organǵa irikteýge qatysý týraly ótinimi men qujattaryn joldasa jetkilikti.
Qazirgi ýaqytta jaryq kórip jatqan jańa shyǵarmalar joqtyń qasy desek te, atalmysh baǵdarlama – dál osy olqylyqtyń ornyn toltyryp, túrli qolbaılaýmen jaryq kórmeı jatqan nemese áli sııasy keýip úlgermegen, dál búgingi kún talaby men údesinen shyǵa bilgen shyǵarmalardyń kóptep jaryq kórýine kórsetilip otyrǵan zor qoldaý ekeni anyq.
Mıra BAIBEK,
«Egemen Qazaqstan»
ALMATY