Qazaqstanda balamaly energııa kózderiniń úlesi 2020 jyly 3 paıyzǵa, 2030 jyly 10 paıyzǵa, 2050 jyly 50 paıyzǵa deıin jetedi dep josparlanǵan. Al aldaǵy jyldary energetıka salasyna tartylatyn ınvestısııalardyń 97 paıyzy jeke sektorǵa tıesili bolmaq. Bul týraly keshe Astanada XI Eýrazııalyq KAZENERGY forýmynda elimizdiń Energetıka mınıstri Qanat Bozymbaev málimdedi. Atalǵan forýmda mınıstr energetıka salasynda qolǵa alǵan aýqymdy sharalardy aıtyp, bolashaqtyń baǵyt-baǵdaryn baıandady.
«Bolashaqtyń energııasyn qalyptastyrý» HI Eýrazııalyq KAZENERGY forýmy – EKSPO-2017 kórmesi aıasyndaǵy qorytyndy sharalardyń biri. Eki kúnge josparlanǵan shara Qazaqstan Úkimeti men Energetıka mınıstrliginiń qoldaýymen uıymdastyrylǵan. Forým BUU aımaqtyq komıssııalary aıasynda bıylǵy jyldyń 11-14 maýsymynda Astanada ótkizilgen Turaqty damýǵa arnalǵan energetıka jónindegi 8-shi halyqaralyq forým men «Energetıkanyń turaqty damýyn qamtamasyz etý» konferensııasy sheńberinde bastalǵan kelisimderdiń jalǵasy sanalady. Forýmnyń ashylýyna Chehııa, Fınlıandııa, Reseı, Grýzııa, Polsha elderiniń energetıka salalarynyń basshylary, sondaı-aq Búkilálemdik munaı keńesiniń prezıdenti Tor Faıeran qatysty.
Jıynnyń ashylýynda sóılegen sózinde Energetıka mınıstri Qanat Bozymbaev Astanada EKSPO bazasynda bolashaq energııalarynyń ınvestısııalyq jobalary men jasyl tehnologııalardyń halyqaralyq ortalyǵy qurylatynyn aıtty. Ol óz kezeginde transformasııalyq energetıkalyq sektor men jasyl bızneske ótýge qatysty tapsyrmalardy oryndaýǵa yqpal etedi. Ortalyq Reseı, Qytaı, AQSh, Úndistan men Latyn Amerıkasy elderimen birlesip jumys atqarady. Ol EKSPO tájirıbesiniń laıyqty jalǵasy bolmaq.
Q.Bozymbaev sondaı-aq aldaǵy jyldan bastap elimiz munaı men gaz salasynda jer qoınaýyn paıdalanýǵa kelisimsharttardyń barlyq túrlerin ońtaılandyrýdy qarastyryp otyrǵanyn atap ótti. Osy rette olardy bekitý merzimin qysqartyp, kóptegen ákimshilik kedergilerdi joıýdy, munaı-gaz shıkizatynyń qory boıynsha eseptilik standarttarynyń halyqaralyq júıesine kóshýdi iske asyrý kózdelgen. Sonymen qatar, mınıstr munaı óńdeýde energııa tıimdiliginiń jobalary engizilip jatqanyn, munaı óńdeýshi zaýyttardyń úsh jylda bir ret jóndeý kezeńine kóshirilgendigine toqtaldy. Qazaqstan strategııasy tek dástúrli energetıkanyń joǵary kórsetkishterine ǵana emes, sonymen qatar kezeń-kezeńmen balamaly ári jańǵyrmaly energııa kózderin damytýǵa baǵyttalǵan. Sońǵy jyldar balamaly energetıka kóptegen elderdiń úkimetteri tarapynan qoldaýǵa ıe boldy, osy oraıda Qazaqstan da energııalyq balansqa balamaly jáne jańǵyrmaly energııany belsendi túrde engizýge baǵyt aldy. Bul turǵyda onyń jalpy kólemdegi úlesi 2050 jylǵa qaraı 50 paıyzdy quraıtyn bolady. Munaı-gaz salasynda burynnan tıimdi yntymaqtastyq ornatqan iri korporasııalardyń tájirıbesi bizge osy salada da paıdaly bolady dep sanaımyz. Sondyqtan biz tıisti kelissózderdi júrgizdik jáne kóptegen kompanııalar atalǵan salada Qazaqstanda jumys júrgizýge nıetti, dedi mınıstr.
HI KAZENERGY Eýrazııalyq forýmynda álemdik energetıkalyq kompanııalar turaqty energetıka kózderin tıimdi basqarý, energııa resýrstarynyń óndirilýin, saqtalýyn jáne paıdalanylýyn baqylaý, energııa kózderine qol jetkizý, klımattyń ózgerýi jáne kómirqyshqyl gazy shyǵaryndylaryn tómendetý, balamaly energııa kózderiniń paıdalanylýyn yntalandyrý, energııalyq tıimdilik boıynsha baǵdarlamalardy jáne «aqyldy» energetıkany engizý, ýran jáne atom salasyn ınnovasııalyq turǵyda damytý sııaqty máseleler talqylandy.
Dınara BITIK, «Egemen Qazaqstan»
Sýretti túsirgen Erlan OMAR, «Egemen Qazaqstan»