Keńeske Mańǵystaý oblysynyń ákimi Eraly Toǵjanov, basqarma basshylary, depýtattar, aýdandar men qalalar ákimderiniń orynbasarlary, aýdandyq, qalalyq mádenıet bólimderiniń basshylary, mádenıet salasynyń ardagerleri, aımaqtyń óner men mádenıet salasynyń qyzmetkerleri qatysty, dep habarlaıdy Mańǵystaý oblysy ákiminiń baspasóz qyzmeti.
Elbasy «Qazaqstannyń úshinshi jańǵyrýy: jahandyq básekege qabilettilik» Joldaýynda «Bolashaqqa baǵdar: rýhanı jańǵyrý» maqalasynda ult sanasyn jańǵyrtýǵa, qazaqstandyq mádenıetti ilgeriletýde jáne dástúrlerimiz ben mádenıetimizdiń naryqtyq qaǵıdalar men jahandyq ekonomıkadaǵy aldyńǵy qatarly tehnologııalarmen sıntezin qalyptastyrýǵa qatysty mádenıet-óner salasynyń qyzmetkerlerine úlken jaýapkershilik júktedi.
Keleli keńeste Rýhanı Jańǵyrý boıynsha óńirde atqarylǵan jumystardyń oryndalýy aıtylyp, aldaǵy mindetter aıqyndaldy.
«Rýhanı jańǵyrý» baǵdarlamasynyń «Rýhanı qazyna» kishi baǵdarlamasyna engen oblystyq tarıhı ólketaný mýzeıiniń mamandary usynǵan zamanaýı etnoaýyl jobasyn jasaqtaý boıynsha Tamara Jumalıeva, О́ńirdiń dástúrli mýzykalyq mektebin nasıhattap, rýhanı murasyn dáripteý úshin jasaqtalatyn elektrondyq saıt jobasy boıynsha ólketanýshy Sultanbek Qudaıbergen, О́lkeniń tarıhı-mádenı qundylyqtaryn zertteý, saqtaý jáne nasıhattaý sharalary boıynsha Mańǵystaý memlekettik tarıhı-mádenı qoryǵy dırektornyń orynbasary Marat О́tesinov, 2003 jyly Elbasynyń tapsyrmasymen arnaıy ashylǵan N.Jantórın atyndaǵy mýzykalyq drama teatrynyń ózekti máseleri týraly teatr dırektory Nurnııaz Muqanuly baıandama jasady.
- QR Prezıdenti N.Á. Nazarbaev bıylǵy «Bolashaqqa baǵdar: Rýhanı jańǵyrý» atty baǵdarlamalyq maqalasynda ozyq rýhanı jańǵyrýdy saıası jáne ekonomıkalyq jańǵyrýlardyń ózegi dep atap, «Mádenı mura» jáne «Halyq – tarıh tolqynynda» baǵdarlamalarynan da aýqymdy, irgeli jumystardy júzege asyrý qajet ekenin aıtty. Másele ózindik mádenıettiń berik irgetasynda bizdiń halqymyzǵa damyǵan memleketterdiń qataryna kirý jolyn senimmen jalǵastyrýǵa múmkindik beretin úzdik salt-dástúrler men jańa qundylyqtardy damytý týraly bolyp otyr. Memleket basshysy atap kórsetken qoǵamdyq sanany jańǵyrtýdyń negizgi baǵyttarynyń biri: Ulttyq jáne mádenı biregeılikti saqtaý. Ulttyq salt-dástúrlerimiz, tilimiz ben mýzykamyz, ádebıetimiz, joralǵylarymyz, bir sózben aıtqanda ulttyq rýhymyz boıymyzda máńgi qalýǵa tıis, - dedi Mańǵystaý oblysynyń ákimi Eraly Toǵjanov.
Sonymen qatar, óńir basyshysy Astanada ótken Mańǵystaýdyń mádenıet kúnderiniń joǵary deńgeıinde ótýine erekshe úles qosqan mádenıet salasynyń birqatar azamattaryn Alǵys hatpen marapattady. Aıta keteıik, sońǵy 3 jylda oblystaǵy óner ujymdary 80 jas mamanmen tolyqty. Bıylǵy jyly respýblıkamyzdaǵy óner salasy boıynsha joǵary oqý oryndaryn bitirgen 24 jas qyzmetke kiristi. Basqosýda óńirdegi mádenıet óner salasynyń kóptegen ózekti máseleri talqylanyp, usynystar berildi.