«Rıng koroli» anyqtaldy

Oblystyq deneshynyqtyrý jáne sport basqarmasynyń bas­shysy Rýslan Esenalınniń aıtýynsha, sharshy alańda ju­dyryqtasýǵa nıet bildirgen úmit­kerlerge jas mólsheriniń shek­teýligi jáne densaýlyǵynyń myqtylyǵymen qosa, sońǵy úsh jyl boıy ulttyq quramaǵa múshe bolmaý sekildi jeńildetilgen shart-talaptar qoıylǵan. Sol sııaq­ty sport sheberlerine qa­tysýǵa da tyıym salyndy. Desek te, burynǵy ataq-marapattarynan at úrketin gúrzi judyryq ıeleri arnaıy at arytyp kelip, irikteý kezeńderi jan alysyp, jan berisken kezdesýlerge toly boldy. Máselen, qyzyljarlyq Ja­baı Ahmetov jerlesi Rýslan Ka­nafındi birinshi raýndta teh­nıkalyq nokaýtqa jiberse, 52 jastaǵy Andreı Sarev taekvondodan qara belbeý ıesi, pankratıonnan álem júldegeri, «Arlan Grıp» týrnıriniń birneshe már­te jeńimpazy 37 jastaǵy alma­tylyq Karen Pashekııanǵa ájep­táýir qarsylyq kórsete bildi. 

Al fınaldyq saıysqa irkil­meı jetken kil myqtylar bes salmaq dárejesi boıynsha kúsh synasty. Sharshy alańǵa bi­rinshi bolyp Jabaı Ahmetov pen qostanaılyq Raýf Alıev kóterildi. Raýf qar­sylasyn soqqynyń astyna alǵanymen, Jabaı ábjil qımyl ta­nytyp, jeńisti ýysynan shyǵarmady. Petropavl qalasy zaýyttarynyń birinde temir jo­nýshy bolyp jumys isteıtin Sanat Maqanov ataǵy jer jaratyn bishkektik qarsylasy Týr­dyogly Abdylahattan esh yq­qan joq. Tájirıbeli boksshyǵa qarsy jastyq qaıratyn qarsy qoıa bildi. 80 kılo salmaq dáre­je­sinde Emil Imanbekov Erbol Ju­lymbekovten aılasyn asyrdy.

Bokssúıer qaýym sporttyń birneshe túrin kásipqoılyqpen meńgergen Karen Pashekııanǵa erekshe qurmet kórsetip, onyń jeńetinine esh shúbá keltirmegen edi. Biraq, ol birinshi raýndta kútpegen jerden jaraqat alyp, jeńis Andreı Stepýraǵa buıyrdy. Asa aýyr salmaqta petropavldyq alyp kúsh ıeleri Ádil Nurjaýypov pen Andreı Beı­senbaev judyryqtasyp, al­dyńǵysy sál-pál basymdyqpen jeńiske jetti. Báıgege tigilgen 1, 2 mıllıon teńge ár salmaq bo­ıyn­sha anyqtalǵan «rıng ko­rol­derine» saltanatty túrde ta­bys etildi.

Qyzyljar tórinde eli­miz boıynsha tuńǵysh ret uıymdas­tyrylǵan halyqaralyq «Rıng koroli» týrnırin dástúrge aınal­dyrýdy sport jáne deneshy­nyqtyrý basqarmasy óz moınyna aldy. 

О́mir ESQALI, «Egemen Qazaqstan»

Soltústik Qazaqstan oblysy