Taıaýda qazaq poezııasynyń asa kórnekti ókili, daýylpaz aqyn Qasym Amanjolovtyń atyndaǵy «Dúnıege keler áli talaı Qasym» atty jyr músháırasy ótti.
Qaraǵandy oblysynyń Tilderdi damytý basqarmasy bıyl ıgi sharany oblys ortalyǵyndaǵy Qasym eskertkishiniń aldynda uıymdastyrdy. Dástúrli báıgede oblystyń qazaq jáne orys tilderinde jyr jazatyn aqyndary baq synady. Músháıraǵa 18 ben 40 jas aralyǵyndaǵy barlyǵy 23 úmitker óleń usynǵan bolatyn. Onyń ishinde eki shyǵarma orys tilinde jazylǵan. Baıqaý sharty boıynsha úmitkerler Qasym Amanjolovqa jáne erkin taqyrypqa arnalǵan eki óleńnen tapsyrdy. Músháıra qorytyndysynda bas júlde oblystyq «Ortalyq Qazaqstan» gazetiniń bólim meńgerýshisi, «Sert» kitabynyń avtory, jas aqyn Jánibek Álımanǵa buıyrdy. Birinshi oryndy da oblystyq «Ortalyq Qazaqstan» gazetiniń aǵa tilshisi R.Qabıdoldın alsa, ekinshi júlde J.Shalqar men N.Kramerǵa bólinip berildi. Al úshinshi orynǵa A.Qumaı, A.Oraı, B.Noǵaıbaıuly laıyqty dep tanyldy. Músháıra jeńimpazdary dıplomdar jáne aqshalaı syılyqtarmen marapattaldy.
Is-shara «Rýhanı jańǵyrý» baǵdarlamasynyń «Týǵan jer» jobasynyń aıasynda jáne Alash qozǵalysynyń 100 jyldyǵyna oraı ótti.
Mıras ASAN,
«Egemen Qazaqstan»
Qaraǵandy oblysy