Mereı Qart 1989 jyly Shyǵys Qazaqstan oblysy Tarbaǵataı aýdany Úshtóbe aýylynda dúnıe esigin ashqan. Fılologııa ǵylymdarynyń magıstri. Semeıdegi Abaı atyndaǵy memlekettik qazaq mýzykaly drama teatrynyń ádebıet bólim meńgerýshisi.
Saıypqyran Saqtyń ulymyn! Arqyrasa tarpań kúreńim, Bal-bul da janar túr-óńim. Kóneden qalǵan kózimsiń, Kúmis kómkergen júgenim. О́mildirigim de din aman. О́n-boıyn oıý quraǵan. Omyraý tusy shashaqbaý, Astary – qyzyl shuǵadan. Kóshpendi elmiz kósheli. Mańdaıbaq bitken bes eli. Quıysqanym da – quıma altyn, О́rkenıetim ǵoı keshegi. Jaratyp mingen kúligin, Saıypqyran Saqtyń ulymyn! Úzeńgimen-aq úzgenbiz, Qarsy shapqan qasqyr julynyn. Taqym qajamas taralǵym, Zerlengen sheti – sary altyn. Bylǵary-bekzat toqymym, Osy kúnge aman oraldyń. Shóldesem qymyz ishkenim. Shıpasy qandaı kúshti ediń! At terin adal simirgen, Jabaǵyjúndi ishpegim. Qaıyńnan shapqan qaptalym, Jádigerimdeı saqtadym. Ińirge tizgin qańtaryp, Izginiń kúttim aq tańyn! Qanjyǵam – qutty qaıystan. Shyńdalǵam kókpar-saıystan. Bes jastan shaýyp báıgege, Janarymnan jasyl jaı ushqan. Qamshym da – qyzyl tobylǵy. Soqqyzba, taǵdyr, sanymdy. Keler ǵasyrǵa attandym, Ońǵarsa Táńir jolymdy!
Jannyń túngi tylsymy Aıǵa laqtyryp shylbyr ushyn, Aıdalada tún qattym. ... úkidaýys úńgir ishin Úr qyzyna tyńdattym!
Ol sulýdyń tósenishin Saldym balǵyn arshadan. Sezim shoǵyn kóseý úshin, Ertekti eren ańsaǵam!..
Oıymdaǵy ottyń kúshin Sanadan tys laýlattym!.. Kóńil úshin – Shegirte únin Alaqanyma aýnattym!
Maıyn da iship tasbulaqtyń, Martý qyzyn qushyp em!.. Qara jonnan qasqyr attym, Qara sózdiń kúshimen!
Jyndar ǵashyq bálkim maǵan?.. Jyrdan asqan bar ma din?.. Japalaq kózimen jarqyldaǵan, Jylan dátin arbadym!
Sońyna erdim shubar laqtyń!.. At jalynan shoq úrlep!.. Bult ishinde bulan baqtym! Qulan kózi – shegirkók!..
Quzdarmen de qaýqyldastym. Elirdim jel eserge! Juldyzdarmen ańqyldastym, О́zge álemge kósherge!..
Adastyrdy bir muń sary!.. Qaıda boldym?!.. Ań-tańmyn!.. Qulanıek qulqunsári... Qııalymdy qańtardym!
Qamshy
Shabandozdan shyǵa qoımas sert jutań, Atqa shapsam jalyn qushyp, órt jutam. Sáıgúliktiń kóz sorasyn súrtetin, BÁIGE QAMShYM tobylǵy sap, tórt tutam. Jylqy minsem kóńil aýmas kúıbeńge. Ystyq qanym tamyrymda bıleýde. Talys teri qaq aıyrylyp ketedi, DOIYR QAMShYM ıirilip tıgende. Torymenen topqa kirseń dý ańsap, Abyroı ǵoı salym salyp qýansaq! Aıbat bergen, qaırat qosqan boıyma, KО́KPAR QAMShYM, jylan teri, jýan sap. Arba shegip, jelisine shalqymaý, Paı-paı deýsiz, ótken ómir olqylaý. Dárte basyn úsh aınalyp oraıdy, SOPY QAMShYM uzyn qulash, jalqy baý. Jylqy syryn bir adamdaı túsinem, Tańdap minem tarlanbozdy ishinen. Iiremin asaýy kóp úıirdi, Úsh shyǵyrshyq ÚIIR QAMShY mysymen. Janǵa qýat sáıgúlikke baı dalam, Tektileri tuǵyrynan taımaǵan. Asaý minsem bas bermeıtin, baǵynbaı BAPTAÝ QAMShYM borbaıynda oınaǵan! О́mir mynaý qysqa qamshy sabyndaı, Arǵymaq kún ótip jatyr saǵymdaı, Qara óleńim báıge bermes - Qara ker, Keledi áne, aýyzdyqqa baǵynbaı!
* * * Tastan da tálim tyńdappyn. Tamshynyń úni – jumbaq muń, Túıejapyraq búrkenip, Japalaq syndy tún qattym. Daýsymdy estip ár qyrdan, Jartas ta jarqyn jańǵyrǵan. Bulaq ta , shóp te jyr oqyp, Esimnen talaı tandyrǵan. Amal ne... jazdyń sońǵy aıy. Qustar da keter... shalǵaıy... Meniń de janym sýyıdy-aý, Sýdyń da qatyp toń maıy. Tamyzdyń túbi – qapyryq. Mańyranǵan – nendeı maqulyq?!.. Dýalap bultty kórsem be, Jyndarymdy shaqyryp!..
Jan syryn jóndep oqymaı, Adastym, sirá, apyr-aı!. Aqylyńdy aıtshy sen maǵan, Táńirge, Kúnge jaqyn Aı!.
Adasý... Kóńil de, Besqasqam da ala qashyp, Taý ishinde adastym, qara basyp. Aı týmaǵan. Aınala – tasqarańǵy. Sýyq úreı túnetti sanama shyq…
Jyny órgende at jalyn jeldiń kári, Taqym qyzyp, Tebinip… Jannyń qamy. Qııa kesip, kól keshken sekildenem… Quzǵa baryp tireıdi joldyń bári!
Temirqazyq buǵynyp bult ishine, Tún úńiler bozarǵan túr-túsime. Obalar ma ulyǵan qasqyr bolyp?.. Qumar urǵan Martýdyń kúlkisi me?!..
Jańylysyp ádetki izgi oıymnan… Qaıyń – qyzdan aınymaı!.. Qyz – qaıyńnan!.. Esimdi bir jıǵanda, Japalaqtar Jarqyl-jurqyl ketti ushyp quz qoınynan!.. … Men solaısha taý túnep, Tań asqanmyn. Arsha ıisimen aqyldy alastadym. Azap emes, kádimgi ǵajap eken – – at ústinde, Aı izdep adasqanyń!..