Fýtboldan Qazaqstan quramasy 2018 jylǵy álem chempıonatyna irikteý kezeńi aıasynda Armenııaǵa qarsy sońǵy oıynyn ótkizip, 1:1 esebimen teń tarqasty. Kezdesýden keıin quramanyń bas jattyqtyrýshysy Aleksandr Borodıýk ádettegideı jýrnalısterdiń suraqtaryna jaýap berdi.
– Búgin alańǵa shyqqan jigitterdiń barlyǵy qal-qadirinshe óz sheberlikterin kórsetti. Olarǵa esh ókpem joq, tek alǵys aıtqym keledi. Bul keshte jeńiske jetetin sátter de kóp boldy. Alaıda, jeńilip qalýymyz da ábden múmkin edi. Átteń, jigitter júıkeni tozdyrmaı, berilgen tapsyrmany tolyqtaı oryndaǵanda jaǵdaı basqasha bolar edi.
– Búgin quramaǵa tájirıbeli tórt-bes oıynshymyz kómektese almady. Osy qurammen Genrıh Mhıtarıan sekildi fýtbolshysy bar komandaǵa qarsy turý qanshalyqty qıynǵa soqty?
– Tájirıbeli fýtbolshylardyń bizge kómektese almaǵany ókinishti-aq. Áıtkenmen alańǵa shyqqan jigitter óz eli úshin synǵa tústi. Aldaǵy ýaqytta osylar quramanyń negizgi fýtbolshysy bolatynyna senimim mol. Al túrli sebeptermen kelmegen oıynshylar ózderiniń myqtylyǵyn qaıta dáleldeý kerek. Básekelestik bar jerde nátıje joǵary bolatynyn umytpaýymyz kerek. Meniń túsinigimde quramaǵa tek jany ashıtyn, shyn patrıot fýtbolshylar ǵana kelý kerek.
– Quramamyz birinshi kezeńde – 5-3-2, al ekinshi kezeńde – 4-4-2 úlgisinde óner kórsetti. Munyń syry nede?
– Alǵashqy 45 mınýtta bizde birneshe múmkindikter boldy. Nurǵalıev qaqpashymen jekedara shyǵyp, óz múmkindigin múlt jiberip aldy. Eger de gol salǵanymyzda, ssenarıı basqasha bolar edi. Áıtkenmen, «sen salmasań, saǵan salady» degen qaǵıdanyń kebin tarttyq. Bizge qaýip tóndirgen shabýyldardyń basym bóligi qaptaldardan kelip jatty. Nátıjesinde, birinshi kezeńde bir gol jiberip aldyq. Qaptaldaǵy qorǵaýshylar óz jumystaryn oıdaǵydaı atqara almaǵannan keıin, kelesi josparymyzǵa kóshýge májbúr boldyq.
– Irikteý kezeńi aıaqtaldy. Úsh upaı enshiledik. Osy nátıjege kóńilińiz tola ma? Qazaqstan quramasynyń bas jattyqtyrýshysy qyzmetine laıyqpyn dep oılaısyz ba?
– Bul suraǵyńyzǵa jaýap bermeı-aq qoıaıyn (Jattyqtyrýshynyń jaýabyna kóńili tolmaǵan jýrnalıst zaldan shyǵyp ketti – avtor).
– Qarsylas komandaǵa kóbirek shabýyldaý úshin Hıjnıchenkodan bólek Shetkındi de shyǵarý kerek pe edi, qalaı oılaısyz?
– Josparymyzda osyndaı taktıka bolǵan. Alaıda, oıyn sońyna taman qarsylastarymyz alańnyń orta tusynan jıi shabýyldaı bastaǵannan keıin, biz eshteńeni ózgertkimiz kelmedi.
– Aldaǵy irikteý kezeńinde qandaı josparyńyz bar?
– Bul suraǵyńyzǵa bir aptadan keıin jaýap bereıin. Kelesi aptada fýtbol federasııasynyń basshylarymen kezdesip, josparymyzdy aıqyndap alamyz dep oılaımyn.
– Alǵash kelgendegi josparyńyz boıynsha komandaǵa jas fýtbolshylardy tarta aldyńyz ba?
– Jastar quramasynyń kúntizbesi qurama oıyndarymen sáıkes kelgendikten, jastarǵa qolqa sala qoımadyq. Olardyń toptan shyǵýǵa múmkindigi joǵary. Sondyqtan, bul joly jastardy shaqyrǵanymyz joq. Biz jastar quramasynan bes-alty jas fýtbolshyny baqylap júrmiz. Eger de keler maýsymda óz klýbtarynda negizgi quramda oınasa, onda olar mindetti túrde quramaǵa shaqyrylatyn bolady.
Esterińizge sala keteıik, Qazaqstan quramasy fýtboldan 2018 jylǵy álem chempıonatyna irikteý kezeńi aıasynda Armenııany quramasyn qabyldap, 1:1 esebimen teń tústi.
Almas MANAP, "Egemen Qazaqstan"