Jyl saıyn 14 qazanda atyraýlyqtar qala kúni merekesin atap ótedi.
Bıyl da munaıly mekenniń meıramy erekshe sharalarǵa toly. О́tken senbide 500-den astam atyraýlyq velosherýge qatysty. Toǵyz shaqyrym joldy júrip ótken velosıpedshiler arasynda altydaǵy baladan alpystaǵy qarııaǵa deıin bar. Salamatty ómir saltyn nasıhattap, buqaralyq sportty damytýǵa baǵyttalǵan sharaǵa oblys ákimi Nurlan Noǵaevtan bastap aımaq turǵyndary belsendi qatysty. «Bul óte jaqsy úrdis, - dedi aımaq basshysy. –Qala kúnine oraı mádenı-kópshilik, sporttyq sharalar josparlandy. Osyndaı aksııalarǵa oblys turǵyndarynyń nemquraıly qaramaıtyny qýantady».
Jarys alańy Atyraý qalasynyń ortalyq kóshesinen bastalyp, toǵyz shaqyrymǵa sozyldy. Velosherýde úzdik nátıjelerimen kóringen qatysýshylarǵa arnaıy atalymdar boıynsha syılyqtar tabystaldy.
Qala kúni aıasynda «Sulýlyq álemdi qutqarady» atty halyqaralyq sýretshiler sımpozıýmymen bastalatyn sharalar legi «Jas daryn» baıqaýy, shahmattan ashyq týrnır, múmkindigi shekteýli jandar arasynda qalalyq festıval, azyq-túlik ónimderiniń jármeńkesi, jastar teatrynyń qoıylymy, qazirgi zamanǵy kóshe bıleri baıqaýy, Mýzeı túni, marafon, dzıýdodan, baıdarka men kanoe esýden týrnır bolyp jalǵasady. Al 14 qazanda oblys ortalyǵynda «Retro» saıabaq jáne «Dos-Muqasan» kishi sáýlet nysany ashylady. Oǵan aty ańyzǵa aınalǵan top arnaıy kelip qatysady.
Baqytgúl BABASh,
«Egemen Qazaqstan».
ATYRAÝ.
Sýretti túsirgen Erlan Altybaev.