Búgin, 9 qazanda aımaq basshysy Nurlan Noǵaev depýtattarǵa QR prezıdent əkimshiligimen kelisilgen Qyzylqoǵa aýdanynyń jańa əkiminiń kandıdatýrasyn usyndy. Ol - buǵan deıin Atyraý oblystyq jer qatynastary basqarmasynyń basshysy bolǵan Arman Bajenov.
Aýdandy osyǵan deıin basqarǵan Maqsot Muqanov búgin Atyraý oblystyq aýyl sharýashylyǵy basqarmasynyń basshysy bolyp taǵaıyndaldy. Nurlan Noǵaev Maqsot Muqanovqa atqarǵan qyzmeti úshin alǵys aıtyp, jańa jumys ornynda tabys tiledi.
Aýdandyq məslıhat sessııasynda depýtattar kandıdatýrany qoldaǵannan keıin Bajenov aýdan aktıvine tanystyryldy jəne aımaq basshysynan Qyzylqoǵa aýdanynyń əleýmettik-ekonomıkalyq damýyna qatysty birqatar tapsyrmalar aldy.
Jańa taǵaıyndalǵan aýdan əkimi Atyraý munaı jəne gaz ınstıtýtyn, Qazaq ulttyq ýnıversıtetin ınjener-ekonomıst, jerge ornalastyrýshy mamandyqtary boıynsha bitirgen. "QR təýelsizdigine 20 jyl", "QR Konstıtýsııasyna 20 jyl" mereıtoılyq medaldarymen marapattalǵan. "Qurmetti jerge ornalastyrýshy" belgisiniń ıegeri.
Eńbek jolyn 2003 jyly Atyraý oblysy Qurmanǵazy aýdany Aqkól okrýgi əkiminiń bas mamany jəne əkim orynbasary qyzmetinen bastaǵan. 2006 jyly Qurmanǵazy aýdany Kóptoǵaı aýyldyq okrýginiń bas mamany boldy.
2007-2008 jyldary Arman Bajenov Atyraý qalalyq jer qatynastary bóliminde bas maman, bólim basshysynyń orynbasary qyzmetin atqardy. 2008 jyly oblystyq jer qatynastary basqarmasy basshysynyń orynbasary qyzmetine aýystyryldy. 2015 jyldan kúni búginge deıin osy basqarmanyń basshysy boldy.