«Alash» partııasy men Alashorda halyqtyq keńesiniń resmı qurylýyna 100 jyl tolyp otyrǵan dataly mereke qarsańynda Astana qalalyq ortalyqtandyrylǵan kitaphanalar júıesi men J.Bekturov atyndaǵy Qaraǵandy oblystyq jasóspirimder kitaphanasy respýblıkalyq «Bir el – bir kitap» aksııasy aıasynda oqyrmandardyń onlaın (on-line) júzdesýin ótkizdi.
Bul retki mádenı sharanyń ózegine qazaq aqyny Sultanmahmut Toraıǵyrovtyń shyǵarmasyndaǵy elshildik ıdeıasy taqyryp boldy. О́ıtkeni bıylǵy jyldyń «Bir el – bir kitap» aksııasyna atalmysh aqyn shyǵarmalary tańdalǵan bolatyn. Bar-joǵy 27 jyl ǵumyr súrgen aqynnyń shyǵarmashylyǵy jaıly kezinde qazaq ádebıetiniń qabyrǵaly ókilderi M.Bazarbaev, B.Kenjebaev, S.Qırabaevtar ony «Abaıdan keıin qazaq eli ishindegi áleýmettik teńsizdikti jete kórip, ony óz shyǵarmalarynyń arqaýy ete bilgen, talantty aqyn» dep baǵalaǵan bolatyn.
Basqasyn aıtpaǵanda, jasy 20-ǵa tolar-tolmasta jazǵan «Qarańǵy qazaq kógine, órmelep shyǵyp kún bolam...» deıtin órshil rýhty tirkesi men «Men qazaq» óleńindegi:
Men qazaq, qazaqpyn dep maqtanamyn, Uranǵa «Alash» degen atty alamyn. Súıgenim – qazaq ómiri, ózim – qazaq, Men nege qazaqtyqtan saqtanamyn?! – deıtin osy bir shýmaǵy shyn máninde úlken júrek qana aıta alatyn, zamanamen úndesken sóz.
Osylaı onlaın júzdesýge qatysqan qos shahar oqyrmandary aqynnyń órshil jyrlaryna qanyqqan soń, onyń shyǵarmalaryndaǵy alashshyldyq taqyrybyn qaýzady. Qaraǵandylyq aqyn-jazýshy Rýslan Nurbaıdyń moderatorlyq tizginine baǵynǵan kómirli qalanyń stýdentteri S.Toraıǵyrovtyń Alash ardagerleri Á.Ermekov, B.Sársenov, H.Ǵabbasov, R.Mársekter jazǵan «Tanystyrý» atty tolǵaýynan úzindiler oqysa, astanalyqtar atynan Menedjment jáne bıznes kolledjiniń stýdentteri men №48 qazaq orta mektep oqýshylary jáne jekelengen kitaphanashylar aqynnyń ómirbaıany jaıly shejirelik tanystyrylymyn baıandap berdi.
Ásirese órshil aqynnyń qazaqtyń úsh arysy jaıly jazǵan:
Basynda ol qaraǵym tur ǵoı daıyn, Tez uzaq ómir bersin bir qudaıym. Dýlatov, Baıtursynov, Bókeıhanov, Bilemin bul úsh erdiń aıtpaı jaıyn. Keshegi qara kúnde bolmap pa edi, Biri kún, biri sholpan, biri aıym. Solardan basqa keshe kim bar edi, Qazaq úshin sham qylǵan júrek maıyn, atty jyry tyńdaýshylardyń kókeıinen shyqty.
Mańyzdy júzdesýdi qortyndylaǵan Astana qalalyq ortalyqtandyrylǵan kitaphanalar júıesiniń dırektory Gúlbadan Mádıbaeva men J.Bekturov atyndaǵy Qaraǵandy oblystyq jasóspirimder kitaphanasynyń basshysy Nurgúl Qalenova hanymdar sharaǵa atsalysqan oqyrmandarǵa rahmet aıtyp, onlaın júzdesýiniń nátıjeli bolǵanyna toqtaldy.
Beken QAIRATULY, «Egemen Qazaqstan»