Qazaqstannyń eńbek sińirgen qaıratkeri, Qazaqstan Respýblıkasy Prezıdenti syılyǵynyń laýreaty, Qazaqstan Jýrnalıstıka akademııasynyń akademıgi, qarymdy qalamger Qaısar Álimniń elimiz baspalarynan jaryq kórgen alty kitaby oqyrmandar qolyna tıdi.
Alash qozǵalysynyń 100 jyldyǵy atalyp ótip jatqan bıylǵy jyly onyń «Mirjaqyptyń oralýy. Vozvrashenıe Mırjakıpa» («Mektep» baspasy, 2017 j.) hıkaıat-saparnamasynyń qos tilde jaryq kórýi osynaý oqıǵaly kezeńge tartylǵan laıyqty syıy derlikteı. 1992 jyldyń 1-18 qyrkúıegi aralyǵynda burynǵy Torǵaı oblysynan jasaqtalǵan arnaýly ekspedısııa Mirjaqyp Dýlatulynyń múrdesin 57 jyldan soń Karel AKSR-iniń Sosnoves stansasyndaǵy qabirden alyp, týǵan topyraǵyna Jankeldın aýdanynyń óz atyndaǵy qaýymdastyq ortalyǵyna qaıta jerleýdiń basy-qasynda bolǵan edi. Sol kezdegi menshikti tilshi Q.Álim osy aıryqsha jaýapty saparǵa respýblıkalyq «Egemen Qazaqstan» gazetiniń tapsyrmasymen qatysqan bolatyn. Avtor táýelsiz memleketimizdiń tarıhyndaǵy osynaý alabóten oqıǵadan kózben kórgenderin, alǵan áserlerin M.Dýlatulynyń ómirimen tyǵyz sabaqtastyra otyryp baıandaıdy.
Qazaqstan Respýblıkasy Mádenıet jáne sport mınıstrligi «Mádenıet jáne óner salasyndaǵy básekelestikti joǵarylatý, qazaqstandyq mádenı murany saqtaý, zerdeleý men nasıhattaý jáne muraǵat isiniń iske asyrylý tıimdiligin arttyrý» baǵdarlamasy «Ádebıettiń áleýmettik mańyzdy túrlerin satyp alý, basyp shyǵarý jáne taratý» kishi baǵdarlamasy boıynsha jaryq kórgen ekinshi kitaby «Bezingen láılek» («Ana tili» baspasy, 2017 j.) dep atalady.
Buǵan tańdamaly shyǵarmalary toptastyrylǵan. «Mekke, Mádınam meniń!» hıkaıatynda ımandylyqtyń altyn arqaýly dińgekteri týraly tebirenis-sezim tereńnen jan tolǵanysymen tartylsa, «Seıilmeıtin muńda» tragedııalyq ómir qaltarysy rýhanı qajyrlylyqpen taramdalady, kúreskerlik shyńdalysty tántileı túsedi. Sondaı-aq «Bezingen láılek» pesasy atom ajalymen aıqastyń zar-nalasynan sabaq túıindeýimen qundy. Al áńgimeleri men esselerinde ulttyq qundylyqtardy, adamgershilik, otansúıgishtik qasıetterdi, mahabbat, dostyq, adaldyq ǵıbrattaryn mazmundy, shynshyl ári kórkem kestelegen. Jumyr jerdiń ár qıyryna jasaǵan saıahat-saparnamalary da tartymdy, qyzǵylyqty oqylady.
Qaısekeń qatty qadirleıtin Ázilhan Nurshaıyqov aǵasymen 34 jyl boıy hat jazysyp júrip, nátıjesinde kitap shyǵaryp, endi óziniń de sol kisige uqsap úzbeı kúndelik júrgizýdi ádetke aınaldyrǵanynyń jarqyn jemisi «О́z órmegim» dep atalatyn qos tomdyǵy («Ana tili» baspasy, 2017 j.) der edik. Birinshisi – 1964-2005 jyldardy, ekinshisi – 2006-2017 jyldardy qamtıdy. Avtor ekinshi kitabynyń alǵy sózinde: «Bir jaǵynan kúndelik úlken jazýdyń jattyǵýy tárizdi. Mı ámanda oıaý júredi, ómirge qushtarlyq eselenedi. Ýaqyttyń qadirin sát saıyn eske salady. Sol sebepti kúndeligim – jan serigim, júrek lázzatym, kóńil qımasym, qalam syılasym... Kúnderim, bermen kelińder! Jaza almasam – maǵan sert! Jazylmaı qalsań – saǵan dert!» dep jan syrymen bólisedi.
Bıylǵy 70 mereı jasyn osyndaı qalamgerlik tabyspen atap ótken ol týraly «Qyzbeldiń Qaısary» degen kitapqa («Ana tili» baspasy, 2017 j.) jáne Qazaqstan Respýblıkasy Bilim jáne ǵylym mınıstrliginiń serııalyq basylymy «Qaısar Álim» atty («Ǵylym ordasy», 2017 j.) bıblıografııaǵa ómiri men shyǵarmashylyǵy týraly maqalalar men esseler, eńbekterine qatysty ádebı resenzııalar, mereıtoılyq arnaý óleńder, sondaı-aq ǵumyrnamalyq hattar toptamasy engizilgen.
Jylqybaı JAǴYPARULY, «Egemen Qazaqstan»
ASTANA