Sońǵy ýaqytta qazaq jazýshylaryn qaıtalap oqýǵa den qoıdym. Tólen Ábdik jetpis bes jasqa keldi degende, kitaptaryn qaıta paraqtap shyqtym. Jaqynda ǵana «Parasat maıdanyn» oqydym.
Ýaqyttyń aldyna shyǵyp, zamannan ozyp otyratyn shyǵarmalar bolady. Qaı kezeńde oqysań da sol kezde jazylǵandaı áser beredi. Jáne osy eskirmeıtin shyǵarmalar qaıtalap oqysań da jalyqtyrmaıdy. «Parasat maıdany» – osy sanatqa kiretin shyǵarma. Adam qartaıǵan kezde ýaqytyna kóp alańdaı bastaıdy eken. Jasyratyny joq, ómirdiń kóp qıyndyǵy jas kelgende túkke turǵysyz bop qalady. Bir kezderi sol qıyndyqtarmen jan aıamaı kúreskenińdi oılaǵanda, keıbirin kúlip, keıin jylap eske alasyń. Kúletiniń: baıansyz dúnıeni baǵaly dep oılappyz; Jylaıtynyń: eń aıaýly qundylyqtar úshin kúresip, birdi-ekilisine ǵana qol jetkizippiz.
Sonda qartaıǵan aqyn ne týraly oılaý kerek? Árıne, ómir týraly. Al «Parasat maıdany» kúndelik ıesi men beıtanys qurby arasyndaǵy ómir týraly tańǵajaıyp áńgime. Zulymdyq pen izgilikten turatyn myna álem aq pen qaranyń shaıqasy ǵoı. Tólen jalpy adamzattyq keńistikte oı qozǵasa, men óz úıshigime kirip alyp, «Parasat maıdany» arqyly óz ǵumyrymnyń aq-qarasyn ajyratýǵa tyrysamyn.
Izgilik nury sónbeýge tıis. Oǵan Tólen Ábdik sııaqty qalamgerlerdiń shyǵarmalary kóp kómek kórsetedi.
Járken BО́DESh, aqyn