Qazirdiń ózinde shamamen 900 myń qazaqstandyq «Nur Otan» partııasynyń «Halyq daýysy» respýblıkalyq aksııasyna belsendi qatysty.
Pavlodar munaı hımııasy zaýyty sııaqty ónerkásiptik iri kásiporyndardyń jumysshylary, etnomádenı birlestikterdiń ókilderi, jastar, sondaı-aq ynta bildirgenderdiń barlyǵy Halyqqa qyzmet kórsetý ortalyqtarynda, qalalardyń ortalyq alańdary men densaýlyq saqtaý jáne bilim berý mekemelerinde jaıǵasqan saýaldama jınaý beketteri arqyly Táýelsizdiktiń 20 jyldyǵy qarsańynda bıleýshi partııaǵa óz usynystaryn bildirip, elge tilekterin aıtty.
Memleket basshysy, «Nur Otan» partııasynyń Kóshbasshysy Nursultan Nazarbaevtyń ultaralyq kelisim men beıbitshilikti saqtaý, ana men balany qoldaý máselelerine basa nazar aýdaryp otyrǵanyna kópshilik óz rızashylyǵyn bildirdi. Qazaqstandyqtar elimizde táýelsiz 20 jylda júzege asqan oń ózgerister týraly aıta otyryp, bizdi jarqyn bolashaq kútip turǵanyna senim bildirdi.
Qazaqstandyqtardyń usynystary men tilekterin jınaýdy «Nur Otan» partııasy odan ári jalǵastyrýda.
«Egemen-aqparat».