Qarashanyń alǵashqy jumasynda Almatydaǵy Á.Qasteev atyndaǵy Memlekettik óner murajaıynda Qazaqstan men Reseıdiń dıplomatııalyq qarym-qatynasynyń 125 jyldyǵyna arnalǵan «Máńgilik birge» kórmesi ashyldy.
Avtorlyq sándik qýyrshaqtar kórmesin uıymdastyrýǵa ejelgi kórshi Reseı Federasııasynyń Almatydaǵy Bas konsýldyǵy muryndyq bolyp, eki eldiń eń úzdik qýyrshaqtaryn bir ekspozısııalyq zalda toǵystyrdy.
Qas sheberlerdiń qolynan shyqqan qýyrshaqtar kórmesinde qazaqstandyq 30 ismerdiń júzge jýyq jumysy qoıylsa, Reseı tarapynan 19 adamnyń 55 týyndysy ákelindi. Bul qýyrshaqtardyń ishinde quny arǵymaqtyń baǵasyna para-pary da bar. Máselen, bul – Reseıde tamasha qýyrshaqtar jasaýmen aty shyqqan Alena Abramovanyń jumysy. Boıy 1 metr 20 sm bolatyn qýyrshaq asyl tastarmen bezendirilgen. Eger qýyrshaqtar jasaý men jınaýǵa búkil ómirin arnaıtyn jandardyń bar ekenin eskersek, qansha qymbat bolsa da, olardyń ıesi tabylmaı turmaıdy. Máselen, Alena Abramova óz jumysyn 3,5 mıllıon teńgege baǵalap otyr.
Kórmege qoıylǵan qýyrshaqtardyń ishinde oryndalýy jaǵynan tánti etpeı qoımaıtyn erekshe týyndylar bar. Mysaly, Elena Fılatova, Elena Novıskaıa, Anastasııa Seroglazova syndy Nıjnıı Novgorod qýyrshaqshylarynyń túrli sıpattaǵy jumystaryn qalaı maqtasań da jarasady. Al Qazaqstan sheberleriniń arasynan Katerına Kýrochkına, Roza Sársenbaeva, Irına Samoılova, Anastasııa Elıseeva, Marına Kýrmanova, Galına Kleapovskaıa, Irına Itahýnovany bóle-jaryp atap ótýge bolady. Bizdiń qýyrshaq jasaýshylar Almaty, Qaskeleń, Kókshetaý, Semeı, Zyrıan, Rıdder qalalarynan jınaldy.
Kórmeniń erekshe bólimi «Bizdiń keńes kezindegi balalyq shaǵymyz» dep atalady. Bul bólim jastyq shaǵy keńestik dáýirmen tuspa-tus ótkender úshin tartymdy ótedi dep kútilýde. Bul kórmege kelgender baıaǵy pıoner otrıadtaryndaǵydaı baraban soǵyp, kerneıletip, taqpaq aıtyp, sol kezeńniń qýyrshaqtaryn tamashalaıdy dep josparlanǵan.
Aınash ESALI, «Egemen Qazaqstan»
ALMATY