Túrkistan qalasyndaǵy Nekrasov atyndaǵy №9 mektep-gımnazııanyń ǵasyrǵa jýyq tarıhy bar. Kóne zamannan syr shertetin bilim uıasynyń shákirtteri men ustazdary 1967 jyly HHI ǵasyr turǵyndaryna arnap hat jazyp, ony mektep aýlasyndaǵy soǵys qurbandary eskertkishiniń irgetasyna arnaıy qorapqa salyp qaldyrǵan eken. Atalǵan hattyń elý jyldan soń ashylýy amanat etilgen. Osy amanat hatty ashý búgingi urpaqtyń enshisine buıyrypty. Mektep ujymy men ata-analar komıtetiniń bas qosýymen elý jyl burynǵy oqýshylar men ustazdardyń amanaty ashylyp, kópshilik aldynda oqyldy. Orys tildi mektep bolǵandyqtan hat sol tilde jazylǵan (qazir qazaq jáne orys aralas mektep-gımnazııasy). Munda mektep ǵımaratynyń 1939 jyly salynǵany, ol Túrkistan qalasyndaǵy tuńǵysh eki qabatty nysan ekendigi atap kórsetilgen. Mektep aınalasy tap-taqyr topyraq bolǵany, odan beride shákirtter men ustazdardyń birlesip, jemis aǵashtarynyń otyrǵyzylǵandyǵy jáne sol aǵashtardyń máýeli baqqa aınalǵandyǵy jazylǵan. Sonymen birge hatqa Uly Otan soǵysynyń qasireti de arqaý bolypty. Mektep-gımnazııa dırektory J.Orynbaevanyń aıtýynsha, elý jyl buryn hatty salý rásimine ıe bolǵan Olga Osıpova, Mıhaıl Shmarın, Gúlhan Sádıqyzy jáne Nellı Shprına jıynǵa arnaıy shaqyrtylǵan. Rýhanı sabaqtastyqty jańǵyrtýǵa baǵyttalǵan shara mektep qabyrǵasynda áli de jalǵasýda. «Elý jylda el jańa» degendeı eki qabatty mektep janynan 4 qabatty oqý ǵımaraty, sport zaly men akt zaldary boı kótergen. Budan bólek qala kóleminde toǵyz qabat bıiktikke deıin túrli nysandar salynǵanyn aıtsaq, sońǵy elý jyl ishinde jańa Túrkistannyń qalyptasqanyn kózge elestetý qıyn emes. Áserli basqosýdyń sońynda búgingi mektep ujymy 2037 jyly oqylýy tıis hat jazyp, atalǵan eskertkishtiń irgetasyna jasyrdy. Hatta álemdegi damyǵan elderdiń qataryna qadam basqan memleketimizdiń muraty qazaq, orys jáne aǵylshyn tilderinde baıandalǵan.
«Egemen-aqparat»