Qazaqstan Respýblıkasynyń Prezıdenti Nursultan Nazarbaevtyń halyqqa dástúrli Joldaýy – eldiń strategııalyq damýyn aıqyndap berip otyrǵan jyl saıynǵy basty qujat. Memleketti damytýda zamanaýı talaptar men órkenıettiń jahandyq kórinisine saı áreket etýdi baǵdarlaıtyn bul qujattyń mazmuny da, qoǵam aldyna júkter jaýapkershiligi de salmaqty.
Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri dáýirinde damýdyń basym 10 baǵytyn aıqyndap bergen bul Joldaý el damýyna jańa serpin bermek.
Qazirgi zaman talabynyń trendi – ındýstrııalandyrý, jańa ozyq tehnologııalardy engizýdiń kóshbasshysyna aınalý talaptaryna basymdyq berilýi qujattyń erekshe mańyzyn aıqyndaıdy. Indýstrııalandyrý prosesiniń jańa tehnologııalyq qalyptyń barlyq múmkindikterin paıdalana otyryp, meılinshe ınnovasııalyq sıpatta negizdelýi maqsat etildi. Bul maqsat eldi zamanaýı talapta alǵa ilgerilete otyryp 30 damyǵan elderdiń qataryna enýge jol ashpaq.
Joldaý ónerkásiptik revolıýsııa álemine beıimdele otyryp, elimizdi sol talaptar údesine saı damytýdyń mańyzdylyǵyn aıqyndap berdi. Zamanaýı tehnologııalardy keńinen qoldana otyryp damýdyń jańa belesin baǵyndyrý jolynda sıfrlyq tehnologııalardyń alatyn ornyna zor basymdylyq berildi. Bul satyda eldiń damýyn sıfrly formatqa kóshirý – kún talabyndaǵy basty mindetterdiń biri ekendigi aıshyqtaldy. Joldaýda kórsetilgendeı, osy jyly «sıfrlyq dáýir» ónerkásibin qalyptastyrýǵa arnalǵan ındýstrııalandyrýdyń úshinshi besjyldyǵyn ázirleý qolǵa alynbaq. Jańa tehnologııalyq qalyp bolashaqta bizdiń sıfrlyq ortada qalaı jumys isteıtinimizdi, eldiń ekonomıkasyn, áleýmettik jaǵdaılaryn túbegeıli ózgertetindigin tarazylaǵan Elbasy bul jańashyldyqqa úlken den qoıyp otyr.
Joǵary bilim berý isinde jasandy ıntellektpen jáne «úlken derektermen» jumys isteý úshin aqparattyq tehnologııalar boıynsha bilim alǵan kásibı mamandar sany kóbeıse, bul elimiz úshin halyqaralyq básekelestik arenada úlken upaı bolmaq. Bul mindet tikeleı ýnıversıtetterge tıesili dep bilemin. Strategııalyq qujatta aıtylǵandaı, bilim berý júıesin, kommýnıkasııa men standarttaý salalaryn jańa ındýstrııalandyrý talaptaryna saı beıimdeý el damýyna jańa silkinis bereri anyq. Osy talaptar údesinen shyǵyp, bastamalar jan-jaqty oryndalǵanda Qazaqstannyń damyǵan 30 eldiń qataryna ený múmkindigi arta túsedi.
Ǵalym MUTANOV,
ál-Farabı atyndaǵy QazUÝ rektory