Alaıda Atyraý oblysynyń damý kórsetkishteri joǵary.
Atyraý oblysynyń áleýmettik-ekonomıkalyq damý kórsetkishteri jyl sanap artyp keledi. Memleket basshysynyń bıylǵy halyqqa Joldaýyn júzege asyrýǵa aımaqta barlyq jaǵdaı bar. Elimizdiń damý basymdyqtaryn aıqyndaıtyn, bolashaqqa baǵdar beretin aıryqsha mańyzdaǵy qujat – Joldaýdy talqylaýǵa arnalǵan aktıv jıynynda oblys ákimi Nurlan Noǵaev osylaı dedi.
Igilikti ister jalǵasyn tabady
– Qazaqstan álemniń eń damyǵan elderiniń qataryna enýdi maqsat qylyp qoıdy. Memleketimizdiń 2050 jylǵa deıin damý strategııasy, «100 naqty qadam» Ult jospary, konstıtýsııalyq reformalar, rýhanı jańǵyrý baǵdarlamasy – bizdi osy uly muratqa jeteleıtin jol. Osy baǵytta ulan-ǵaıyr jumystar atqarylyp, aýqymdy memlekettik jobalar iske asyrylyp jatyr, dedi N.Noǵaev. – Bıylǵy Joldaýda san emes, sapaǵa kóńil bólý, basqalardyń jetistikterin qaıtalaýmen shektelmeı, ózimiz basqaǵa úlgi bolý mindeti qoıylyp otyr. Bul úshin ne isteýimiz kerek, qalaı isteýimiz kerek, munyń bári – Joldaýdyń 10 baǵytynda naqty kórsetilgen.
«О́tken jyldyń qorytyndysy boıynsha, óńirdegi ónerkásip kólemi 2016 jylmen salystyrǵanda 20,8%-ǵa ósip, 5,7 trln teńge boldy. Elbasy aıtqandaı, «Kól-kósir munaıdyń dáýiri aıaqtalyp keledi». Joǵary eńbek ónimdiligi bar óńdeý sektoryn damytýdy baǵdarǵa alý mańyzdy. О́ńdeý ónerkásibindegi eńbek ónimdiligi birinshi jartyjyldyqta 33,8 myń AQSh dollaryn qurady. Quny 5 mlrd teńge bolatyn 344 jumys orny ashylyp, bes joba iske qosyldy. Mundaı ıgilikterdiń bári bıyl da jalǵasyn tabady», dedi aktıv jıynynda óńir basshysy.
Áleýmettik salaǵa aıryqsha nazar
Joldaýda orta bilim berý salasynda jańartylǵan mazmunǵa kóshýdi sapaly uıymdastyrý, ondaǵy jańa baǵdarlamalardy jasaý, oqýlyqtar, standarttar jáne kadrlar daıarlaý máselelerine mán berilgen. Osy baǵytta Atyraýda da bilim berý júıesi jańartylǵan bilim berý mazmunyna kezeń-kezeńimen kóshý jumystaryn bastady. Orta bilim berý mazmunyn jańartý sheńberinde oblys boıynsha 4 586 pedagog biliktilikti arttyrý kýrstarynan ótti.
Oblysta 193 mekteptiń 189-y ınternetke, onyń ishinde 141-i keń jolaqty ınternetke qosylǵan. Shalǵaı eldi mekenderde ornalasqan 21 shaǵyn jınaqty mektep ınteraktıvti quraldarmen jabdyqtalyp, Atyraý qalasynyń 10 mektebinde «Robotty-tehnıka» kýrsy qanatqaqty joba retinde bastaý alyp, nátıjesinde 12 oqýshy respýblıkalyq jáne 6 oqýshy halyqaralyq “Infomatrix” olımpıadasynan júldeli oryn aldy.
Elbasy Joldaýda halyqtyń ómir súrý uzaqtyǵyn, aýrýdy aldyn alý arqyly ómir sapasyn arttyrý máselesine asa nazar aýdarǵan. Demografııalyq kórsetkishter boıynsha ótken jyly oń serpinge qol jetkizildi. 2016 jylmen salystyrǵanda bala ólimi 15,2%-ǵa tómendedi, onkologııalyq aýrýdan ólim kórsetkishi 17,9%-ǵa, qan aınalym júıesiniń aýrýynyń kórsetkishi 9,5%-ǵa, týberkýlezden ólim kórsetkishi 40,9%-ǵa, ana ólimi 30,1%-dan 12,3%-ǵa tómendedi. Densaýlyq saqtaý salasyn sıfrlandyrý baǵdarlamasy aıasynda 34 baǵynysty medısınalyq uıymdarda medısınalyq aqparattandyrý júıesi engizilip, tolyqtaı qamtyldy. Qalalyq emhanalarda elektrondyq kezek júıesi engizilgen.
2017 jylǵy jergilikti atqarýshy organdardyń atqarǵan sharalary nátıjesinde úshinshi toqsannyń qorytyndysymen jumyssyzdyq deńgeıi 4,9 paıyzdy qurady, jalpy oblystyń eńbek naryǵyndaǵy jaǵdaıy turaqty.
Atyraý – týrısterge tartymdy aımaq
О́ńirdiń týrıstik óniminiń biregeıi – ortaǵasyrlyq Saraıshyq tarıhı qalashyǵynyń orny. Bul tarıhı orynda «Ortaǵasyrlyq Saraıshyq» keshenin salý jobasy ázirlenip, búgingi kúni atalǵan jobanyń jobalaý-smetalyq qujattamasy jasaqtalýda. Sondaı-aq Jylyoı aýdanynda áýlıe Beket atanyń týǵan jeri «Aqmeshit» kesheni ornalasqan. Osy nysanǵa qatynaý maqsatynda qazirgi ýaqytta 30 shaqyrym tas jol qurylysy aıaqtaldy, qalǵan 34 shaqyrym jol ýchaskesine jobalaý-smetalyq qujattamasy ázirlenip jatyr.
Halyqpen keri baılanysty jaqsartý maqsatynda aımaqta biraz shara qolǵa alyndy. Telegram qosymshasynda chat-arna ashyldy. 12 qańtarǵa deıin memlekettik organdardyń birinshi basshylary, barlyq deńgeıdegi ákimder jáne orynbasarlarymen 1000-nan astam ótinishke jaýap berildi. Atyraý oblystyq ákimdigi «Atyraý sıfrly qabyldaý» mobıldik qosymshasyn iske qosty, ol da turǵyndardyń memlekettik organdarmen baılanysyn ońtaılandyrýǵa baǵyttalǵan. Munyń barlyǵy oblysta buqara men memlekettik organdar arasyndaǵy senimdilikti nyǵaıtýǵa oń áserin tıgizedi.
«Prezıdent Joldaýyn iske asyrý – ortaq mindet. Memlekettik organdar, kásipkerler, qoǵamdyq sektor, barlyq azamattar, úlkenimiz bar, kishimiz bar jumylyp osyǵan qol jetkize alamyz. Eń bastysy, aýyzbirlik, qajyrly eńbek kerek», degen N.Noǵaev Joldaýda kórsetilgen mindetter boıynsha jaýapty adamdarǵa naqty tapsyrmalar berdi.
Baqytgúl BABASh, «Egemen Qazaqstan»
ATYRAÝ