Atyraý oblysynyń Jylyoı aýdanynda jylyjaı ashyldy. Jylyna 1100 tonna kókónis ónimderin jınaýǵa múmkindik beretin nysan eki gektar jerdi alyp jatyr.
Jańa nysanda Qulsary qalasynyń turǵyndary úshin 30 jumys orny qarastyrylǵan. Mamandardy Gollandııanyń tájirıbeli agronomdary men tehnologtary daıyndady. Qazirgi zamanǵy qurylǵylarmen tolyq jabdyqtalǵan jylyjaıda tamshylatyp sýarý ádisin qoldanady. «Atyraý – Saýda» JShS dırektory Álimjan Baıjigitovtiń aıtýynsha, jabdyqtar TShO-nyń merdiger uıymdarynyń biriniń qoldaýymen alynǵan. Oǵan 2 mln evrodan astam qarjy bólingen. Al qurylystyń iske asýyn kásipker jeke qarajaty esebinen qarjylandyrdy. Alǵashqy ónim birneshe aıdan keıin jemisin bere bastaıdy.
«Jylyjaıda ósirilgen kókónisterdiń sapasy joǵary bolady. Jańa jabdyqtardy, kóshetterge qosymsha kútim jasaýdy, sýdy tazartý júıesin, tamshylatyp sýarýdy qoldaný arqyly oń nátıjege jetemiz degen senim bar. Bizdiń basty maqsatymyz – jergilikti ónimderdiń halyqqa qoljetimdiligin qamtamasyz etý»,-dedi joba bastamashysy Álimjan Baıjigitov.
Atyraý oblysynda jylyjaı ashqysy keletin kásipkerler qatary kóbeıip keledi.Jaqynda Maqat aýdanynyń Dossor kentinde jylyjaı ashyldy. Mahambet aýdanynda 10gektar ónerkásiptik jylyjaı salý josparlanyp otyr, ol úshin jer ýchaskesin bólý ınfraqurylym jumystary júrgizilip jatyr.
Baqytgúl BABASh,
«Egemen Qazaqstan»
Atyraý