Parlament Májilisiniń depýtattary Aıqyn Qońyrov, Roman Kım, Shakır Hahazov oblystyq Qazaqstan halqy Assambleıasynda bolǵan kezdesýde Elbasynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýynyń mán-mańyzyn baıandap berdi.
Jıyndy assambleıa hatshylyǵynyń meńgerýshisi Naıl Salımov ashyp, el ómirinde biregeı qoǵamdyq ınstıtýt retinde qalyptasqan Qazaqstan halqy Assambleıasynyń saıası turaqtylyqty nyǵaıtý jolyndaǵy róline toqtalyp ótti.
Aıqyn Qońyrov óz sózinde tarıhı qujattaǵy jurtshylyq nazaryna usynylǵan mańyzdy mindetterdi aıtyp berdi. «Barlyq salalar boıynsha ilgerileýdiń alǵyshartttary bar. Prezıdent damýdyń jańa sapasyna jetýdiń uzaqmerzimdi maqsattaryn belgilep berdi. Alda turǵan basty talap – órkenıetti memleketterdiń qataryna qosylý. Ol úshin sheshimin kútken máselelerdi tııanaqty sheshe bilýdiń mańyzy zor. Álemniń kóshbasshy elderi tájirıbesinde ındýstrııalandyrýǵa ınnovasııalyq sıpat berý, sıfrlandyrý jónindegi pılottyq jobalarǵa súıený, keshendi aqparattyq-tehnologııalyq platformalardy belsendi túrde engizý – qalypty jaıt. Biz de osy úrdis aıasynda bıik belesterge kóterilý mindetterin qoıyp otyrmyz», – dedi ol.
Shakır Hahazov bilim salasyndaǵy júzege asyrylyp jatqan reformalar jalǵasyn tabatynyna, bilim berýdiń barlyq deńgeıinde matematıka jáne jaratylystaný ǵylymdaryn oqytý sapasy kúsheıtiletinine jınalǵandardyń nazaryn aýdardy. Muǵalimderge tolyqqandy áleýmettik jaǵdaılar jasaýmen qatar ustazdyq mártebeni kóterý alǵy shart sanalatynyn alǵa tartty.
«Urpag» qazaq mádenı-aǵartýshylyq ortalyǵynyń tóraıymy Gúlbaqsha Musabaevanyń aıtýynsha, tarıhı qujat ulttyq sanany jańǵyrtý qaǵıdattaryn odan ári júıeli júrgizýge umtyldyrady. Búgingi kúni ozyq tehnologııalyq úderisterdi jastarymyz erekshe sezinip otyr. Sondyqtan bilim berýdiń jańa sapasyna kóshý ýaqyt talabynan týǵan ómirsheń ózgeris bolyp tabylady. «Kentron» armıan etnomádenı birlestiginiń tóraǵasy Gevork Gevorkıan qoǵamdyq tártipti saqtaý jáne qaýipsizdikti qamtamasyz etý maqsatymen kóshelerde, adamdar kóp jınalatyn qoǵamdyq oryndarda ornatylǵan beınebaqylaý qondyrǵylary ózin-ózi aqtaǵan júıege aınalǵanyn aıta kelip, jol-kólik patrýldik qyzmet ókilderi kólik júrgizýshilerdi negizsiz toqtatpasa eken degen tilegin jetkizse, ardager ustaz Raısa Polıshýk tarıhı qujat «Qazaqstan-2050» Strategııasynyń, «100 naqty qadam» Ult josparynyń zańdy jalǵasy sanalatynyn naqty mysaldarmen túıindedi.
Halyq qalaýlylarynyń qoǵamdyq qabyldaýynda jekelegen azamattardyń ótinish-usynystary muqııat tyńdalyp, sheshý joldary belgilendi.
О́mir ESQALI,
«Egemen Qazaqstan»
Soltústik Qazaqstan oblysy