Elimizdiń 5 dúrkin chempıony «Ertis» Túrkııaǵa attanbaq. Komanda quramynda ózgeris kóp. Bas jattyqtyrýshy bolyp ıspan mamany Jererd Nýs taǵaıyndaldy. Aslan Darabaev sekildi myqty oıynshylary ózge klýbtarǵa aýysyp ketken «Ertis» endi negizinen jergilikti fýtbolshylarǵa senim artady. Sol senimdi arqalaǵandardyń biri – Rýslan Esimov. Ekibastuz fýtbolynyń túlegi byltyrǵy maýsymda negizgi quramda turaqty oınap, pavlodarlyq jankúıerlerdiń seniminen shyqqan. Jas bolsa da jankeshti oıyndarymen kózge túsken qorǵaýshy aldaǵy josparlarymen bólisken edi.
– Jaqynda «Ertispen» kelisimshartty uzarttyń. О́tken jyly negizgi quramda turaqty jaqsy ónerińmen kózge túsken oıynshylardyń birisiń. Basqa komandalardan usynys bolǵan shyǵar?
– Iá, komandamen kelisimge keldik. О́te qýanyshtymyn. Basqa komandalardan usynystardyń bolǵany ras. Degenmen, men úshin qazir «Ertiste» oınaý eń durys sheshim. Pavlodar ózimniń týyp-ósken jerim. Jankúıerlerdiń qoldaýyn erekshe sezinemin. Bári kóńilimnen shyǵady. Qalǵany bolashaqtyń enshisinde.
– Komandany Ispanııadan kelgen jas mamany Jererd Nýs jattyqtyratyn boldy. Bas bapkermen tanysyp úlgerdiń be?
– Tanysyp úlgergen joqpyn. Birer kúnnen soń oqý-jattyǵý jıyny bastalady. Sonda tanysyp, birge jumys isteıtin bolamyz. Ispan mamanynan kóp nárse úırenemiz dep oılaımyn. Bas bapkerdiń seniminen shyǵýǵa tyrysamyn.
– «Ertis» byltyr táp-táýir oınady. Degenmen, «Ordabasyny» qýyp jete almadyńdar. Fýtbolshy retinde maýsymdy qalaı baǵalar ediń?
– Eń bastysy, Eýropa lıgasyna joldama aldyq. Bul basshylyq tarapynan maýsymǵa qoıylǵan tapsyrmalardyń biri edi. El birinshiliginde kóp upaı joǵalttyq. Súreńsiz oıyndar boldy. Keı jerlerde tájirıbe jetpeı qaldy. Aldaǵy maýsymda jaqsy nátıjege qol jetkizýge tyrysamyz. «Ertis» elimizdiń 5 dúrkin chempıony. Sondyqtan jaýapkershiligimiz úlken. Maqsat aıqyn. Júldegerler qatarynan tabylýǵa kúsh salamyz.
– «Ekibastuz» fýtbol klýbynyń túlegisiń. Qatelespesem, alǵashqy kelisimshartqa otyrǵan komandań da osy shyǵar?
– Iá, úlken fýtbolǵa joldama bergen «Ekibastuz» komandasy. Birinshi ret kelisimshartqa 2006 jyly qol qoıǵanmyn. Erekshe áserde boldym. Kásibı fýtboldaǵy jolym osylaı bastalǵan. Bul meniń ómirimdegi óte mańyzdy qadam edi.
– «Ekibastuz» komandasynyń qazirgi jaǵdaıymen tanys bolarsyń...
– Árıne. Komandamen únemi baılanystamyn. Jaqsy ózgerister bolady dep úmittenemin. Jeńse qýanamyn, jeńilse muńaıamyn. Qıyn kezeńder barlyq komandalarda bolady. Basshylyq aýysty. Jańa bapkermen úlken jeńisterge jetedi dep senemin. О́z komandama tek jaqsylyq tileımin.
– Kásibı fýtbolshy bolý bala kezdegi armanyń boldy ǵoı?
– Shynymdy aıtsam, fýtbolshy bolamyn dep armandaǵan joqpyn. Aýlada tańnyń atysy kúnniń batysy tek dop qýalaıtynbyz. Bala kezimizde fýtbol alańyn ózimiz syzyp, qoldan qaqpa jasap oınaıtyn edik. О́se kele, fýtbolǵa degen kózqarasym ózgere bastady. Fýtbol úıirmesine jazyldym. Jaqsy bapker jolyqty. Jasóspirimder jarystaryna qatystyq. Kásibı fýtbolshy bolýǵa múmkindik týdy. Keıinnen durys tańdaý jasaǵanyma kózim jetti.
– Áńgimeńe rahmet.
Áńgimelesken
Erkebulan JOMART,
«Egemen Qazaqstan»