Abaı aýdany aýmaǵynda oryn tepken «Maqsut» ken ornynda birneshe jyldan beri mys, myrysh konsentranty óndirilip jatqany belgili. О́tken jyly 400 myń tonnadan astam konsentratty ıgergen kásiporyn bıyl bul kórsetkishti 1 mıllıon tonnaǵa deıin jetkizýdi josparlap otyr.
Mańyzdysy sol, ken ornynyń basshylyǵy bıznestiń áleýmettik jaýapkershiligi aıasynda aýdannyń qoǵamdyq-saıası, mádenı ómirine belsene aralasyp, óz úlesterin qosýǵa nıetti. Osy maqsatta jaqynda aýdan ákimi Jarqynbek Baısabyrov pen «BAST» AQ prezıdenti V.Ipatov kezdesip, ekijaqty yntymaqtastyq kelisimine qol qoıdy. Aldaǵy ýaqytta Abaı kolledjin dánekerleýshi, qurylys mamany, slesar, traktorıst-mashınıst, aspaz mamandyqtary boıynsha támamdaǵan stýdentter atalmysh ken ornynan is-tájirıbeden ótip, jumyspen qamtamasyz etiletin bolady. Sonymen qatar óndiris ornynyń fılıaly Abaı aýdanyna tirkeýge turyp, zań aıasynda salyq túsimderin tolyq aýdaryp otyrýǵa mindetteldi.
«Bul memorandým Abaı aýdanynyń turǵyndaryn jáne jergilikti kásiptik bilim beretin Abaı kolledjiniń túlekterin jumyspen qamtýǵa zor múmkindik týdyryp otyr. Aýdan bıýdjetin quraıtyn salyq túsimderi de artyp, aldaǵy ýaqytta «BAST» AQ «Týǵan jer» baǵdarlamasy aıasynda demeýshilik jasap, qol ushyn sozýǵa yntaly ekendigin aıtty», deıdi aýdan ákimi J.Baısabyrov.
Azamat QASYM,
«Egemen Qazaqstan»
Shyǵys Qazaqstan oblysy,
Abaı aýdany