AQSh-tyń BUU-daǵy turaqty ókili Nıkkı Heılı BUU Qaýipsizdik Keńesiniń Qazaqstannyń bastamasymen ótip otyrǵan jappaı qyryp-joıýdy taratpaý jónindegi otyrysynyń mańyzdylyǵyn atap ótti.
«Qazaqstannyń osy bir mańyzdy otyrysty uıymdastyrǵany oryndy. Qazaqstannyń táýelsiz memleket retindegi alǵashqy sheshimderiniń biri ıadrolyq qarýdy taratpaý tarıhyndaǵy mańyzdy sátterdiń biri bolyp otyr. Keńes Odaǵy ydyraǵan soń Qazaqstan erikti túrde keńestik ıadrolyq zymyrandardy óz terrıtorııasynan alyp tastaýǵa kelisip, Iаdrolyq qarýdy taratpaý týraly shartqa qosyldy» dep bastady óziniń málimdemesin Nıkkı Heılı.
«Iаdrolyq qarýdan bas tartý arqyly Prezıdent Nazarbaev álemniń ózge elderine úlgi kórsetti. Bul áreket senimdilik týdyrdy. Osy arqyly Qazaqstan kórshi elderge jáne dúnıe júzine qaýip tóndirmeıtinin jetkizdi. Bul ıadrolyq qarýdy taratpaýdyń jahandyq negizi sanalatyn Iаdrolyq qarýdy taratpaý týraly shartqa senimdilik daýysy edi», dep atap ótken AQSh ókili «Eń mańyzdysy, Qazaqstannyń is-qımyldary bul eldiń ózge memlekettermen qarym-qatynasynda beıbitshilik pen turaqtylyqty baǵalaıtyndyǵyn bildirdi. Sózsiz, bul Qazaqstannyń ulttar qaýymdastyǵynyń jaýapty múshesi bolýǵa daıyndyǵyn kórsetti», degen pikir aıtty.
Eske sala keteıik, Qazaqstan Prezıdenti Nursultan Nazarbaev osy kúnderi AQSh-ta resmı saparda. Eki kún buryn Memleket basshysy AQSh Prezıdenti Donald Tramppen kezdesken bolatyn. Búgin ol BUU QK jınalysyna tóraǵalyq etti. Osy jyldyń 1 qańtarynan bastap Qazaqstan BUU QK tóraǵalyǵyna kiristi. Qazaqstan – Ortalyq Azııa elderi arasynda BUU QK turaqsyz múshesi atanǵan tuńǵysh ári jalǵyz memleket.