Aı Úrkerge qarsy qaraǵaly kún qabaǵy qatýly. Aq jamylǵyǵa oranǵan dalany kárine mingen aıaz qarıdy. Úrkerdiń eń shyrqaǵan kezi. Syrma boran kezgen sar dalada sary aıaz saqyldap kúlgendeı... Jer-dúnıeni tońǵa aınaldyrǵan alapatyna súısingen sary aıaz saqyldap kúlmegende kim kúledi?! «Qara jerdiń ólgeni – qar astynda qalǵany» degen osy bolar, bálkim.
Sibirden keldi me, taıgada týa sala alasuryp jetti me, áıteýir, Altaıdyń qoıny-qonyshy da, Arqanyń ashyq-shashyq qolaty da, soltústiktegi qalyń ný da bul shirkinge aıla-amalsyz, tipti Jetisýdyń jelkesinen de yzǵar soǵyp, jarty Qazaqstan qatty aıazǵa qalshyldap-aq tur. Aıtqandaı, bul Soltústik muzdy muhıttyń jaǵasynda dúnıege kelgen aıaz eken. «Qazgıdromettiń» habarlaýynsha, muz qursaýly muhıttyń shetindegi Karsk teńizinde paıda bolǵan antısıklon qanatyn keńge jaıyp, aýqymdy ári ashýly kúıinde elimizdiń ońtústik-shyǵysyn betke alyp, betti qaryp keledi. Arktıkalyq aǵysty qazirdiń ózinde soltústik, kúnshyǵys hám ortalyq óńirlerdiń turǵyndary sezinip úlgerdi. Aldaǵy úsh táýlikte aqyryn jyljyp ońtústiktegi jurtqa da jetpek. Atoı sala kelgen aıaz teriskeıde tún balasynda 40-45 gradýsqa deıin jetse, ońtústikte 28-33 gradýsqa deıin tómendemek. Sol sebepti tótenshe jaǵdaılar qyzmeti Soltústik Qazaqstan, Pavlodar, Shyǵys Qazaqstan, Aqmola, Qaraǵandy oblystarynda 26 qańtarǵa deıin qatty aıazǵa baılanysty daýyl bolýy múmkin ekenin eskertip otyr. Almaty oblysy da ádettegiden 18 gradýsqa deıin tómen aýa raıynda abaılaýdy aıtyp jatyr. Birqatar óńirdegi mektepterde sabaq toqtatyldy. «Astana LRT» JShS habarlaýynsha, elorda mańaıyndaǵy aýyldarda qoǵamdyq kólikter de júre almaı qalǵanǵa uqsaıdy. Tipti О́skemende dala taǵylary qala kóshelerine kirip ketkenin habarlap jatyr.
Árıne, qys qystyǵyn qylmasa, jaz jazdyǵyn qylmaıdy. Ár qubylystyń qaıyry bar. Tek «jiligin shaqpaı maıyn isher» qyraý qabaq qysta qyrǵa qonǵan aǵaıyndy da oılaısyz. Áıtpese, saqyldaǵan sary aıazda sary qamysty qystap otyrǵandaı jyly jerde jan baqqan qalalyqtarǵa jeńil ǵoı. Maly baǵýly, oty jaǵýly. Tek kommýnaldyq qyzmette min bolmaýyn tileńiz. «Qyzyldy qystyń kúni shunaq qatqan, aıazda túkirigiń túspeı qatqan, jabýlap Samarqannyń jibegimen, jabyly janýardy solaı baqqan», dep Ilııas Jansúgirov jyrlaǵandaı, janýar baǵyp otyrǵan jurtqa Jaratqan jylý, shydam, qýat bersin deımiz. Áıtpese, qoǵamdyq kólikter men sabaqtyń toqtaǵany ne táıiri!..
Dýman ANASh,
«Egemen Qazaqstan»
Sýretterdi túsirgen
Erlan OMAR,
«Egemen Qazaqstan»