О́tken ǵasyrdyń 60-jyldary Keńes Odaǵyna qarasty Týva respýblıkasynyń Ovıýr aýdany jáne erekshe mýnısıpaldy ákimshilik birlik Tes-Hem ólkesi men Mońǵolııanyń batysynda ornalasqan Ubys aımaǵy arasynda mal jaıylymyna qatysty shekara daýy týyndaıdy.
Osy máseleni retteý úshin Býrıatııa ASSR-niń Joǵarǵy Keńes tóraǵasy Hohlov bastaǵan ókilder Ubys aımaǵyna keledi. Bul aımaqpen Baıólke eli búıiri jabysqan ejelgi kórshi. Joǵarydaǵy resmı delegasııa quramynda Qazaqstan Kommýnıstik partııasy Ortalyq komıtetiniń múshesi, Qazaq KSR Joǵarǵy Keńesiniń depýtaty, KSRO Jazýshylar odaǵynyń basqarma múshesi, bedeldi jazýshy Sábıt Muqanov ta bolǵan eken.
Memleketaralyq másele ońtaıly sheshilgen soń Sábeń qolsozym irgede turǵan Baıólke aımaǵyna soqpaı ketýge dáti jetpeı, delegasııa basshysyn onda 2-3 kún aıaldaýǵa kóndirgen eken.
Sóıtip 1966 jyldyń qońyr kúzinde Qobda betindegi az qazaqtyń shoǵyry ómir súrip jatqan О́lgeı qalasyna ataqty jazýshy Sábıt Muqanov kelip túsedi. Sábeńniń munda kelýi baıólkelik qazaqtar úshin kókten Ǵaısa túskendeı áser qaldyrdy, dep jazady kóppen birge jazýshyny kútip alýshylar qatarynda bolǵan, búginderi Astana turǵyny, fılologııa ǵylymdarynyń doktory Qabıdash Qalıasqaruly.
О́ıtkeni sol jyldary qaı qazaq bolsyn Sábeńniń «Botakóz» romanyn oqyp shyqqan, «Sulýshash» poemasyn ekiniń biri jatqa aıtatyn, naǵyz bir rýhanı jutynyp turǵan zaman edi.
Halyq Sábeńnen nesin aıasyn, jazýshyǵa sálem bere kelgen 70-80 aqsaqaldyń bárine tóstik qaqtatamyz dep osynshama qoı soıypty. Muny kórgen jazýshy basyn shaıqap: «Ysyrapqa barmańdar, ásire tym aqkóńil ekensińder», degen deıdi. Qysqasy baıólkelik qazaqtar Sábıt Muqanovqa tóbesinde úkili, syrmaly jeldik baýmen noqtalanǵan aq bota syılaǵan eken (sýrette).
Jaryqtyq jazýshy atamyz qonalqaǵa Hohlov ekeýine arnaıy daıyndaǵan qonaq bólmege bir qarap, «qazaqtarym átir sasyǵan orystyń qasynda kúnde qonyp júrmin ǵoı, odan da meni ana eki shaldyń qasyna aparyńdarshy» degen eken. Sábeń aıtqan eki shal da osal emes, biri – Sosıalıstik Eńbek Eri, shopan, shejireshi Serikbaı Jýanǵanuly bolsa, ekinshisi dańǵyl aqyn – Aqtan Babıuly.
Sapary aıaqtalǵannan keıin Sábeń jolaı memleket basshysy Iý.Sedenbalǵa jolyǵyp, mundaǵy qazaqtarǵa qatysty ustanyp otyrǵan partııa saıasatyna úlken rahmet aıtypty. Qazaqstanǵa oralǵan soń bul sapary jaıly «Sosıalıstik Qazaqstan» gazetine shaǵyn maqala jazypty.
Beken QAIRATULY, «Egemen Qazaqstan»